«ՉԻ». Ղարաբաղցի գործարարը կքննադատի իշխանությունների՞ն

«Չորրորդ ինքնիշխանություն» թերթը տեղեկացնում է, որ «Չե՛նք լռելու» երիտասարդական նախաձեռնությունը հայտարարել է, թե հեռախոսային հարցազրույց է իրականացրել ղարաբաղցի հայտնի գործարար Լեւոն Հայրապետյանի հետ, որը քննադատել է իշխանություններին։ Թերթը գրում է, որ հարցազրույցը համացանցում կհայտնվի այսօր։

«ՉԻ» հրապարակման մեջ նշված է նաեւ, որ Հայրապետյանը կոշտ քննադատության է ենթարկել Հայաստանի իշխանությունների վարած ներքին քաղաքականությունը` համարելով ահռելի չափերի հասնող կոռուպցիան եւ ձեւավորված օլիգարխիկ իշխանական համակարգը մեր երկրի գլխավոր չարիք։ Նշենք, որ Լեւոն Հայրապետյանը, որն այժմ գտվում է Եվրոպայում (Շվեյցարիա, Ֆրանսիա), ծնունդով ղարաբաղցի է եւ վերջին տարիներին բնակվում էր ԼՂՀ Մարտակերտի շրջանի Վանք գյուղում եւ հայտնի է նրանով, որ թե՛ իր հայրենի գյուղում եւ թե՛ ընդհանրապես Ղարաբաղում բազմաթիվ ծրագրեր է իրականացրել։ Ըստ որոշ տեղեկությունների, Հայրապետյանը իշխանություններից նեղացել է այն բանից հետո, երբ Ղարաբաղում մեծ աղմուկ էր բարձրացվել իր կողմից Գանձասարի վանական համալիրի պարիսպները վերակառուցելու պատճառով։ Հիշեցնենք, որ ճարտարապետները մեծ անհանգստություն էին հայտնել այն կապակցությամբ, որ ժամանակակից քարերով եւ առանց համապատասխան համաձայնության սալիկապատելով պարիսպը` լիովին փոխվում է կառույցի ճարտարապետական տեսքը։ Նշենք, սակայն, որ սա առաջին դեպքը չէ, երբ գործարարը խնդիրներ է ունենում ԼՂՀ իշխանությունների հետ։ Նման մի միջադեպ էլ եղել է Արկադի Ղուկասյանի իշխանության օրոք։ Ժամանակին Ղարաբաղում մեծ համբավ ունեցող Հայրապետյանի դեմ Արկադի Ղուկասյանի երկրորդ ընտրություններից հետո իշխանական մամուլի կողմից ուղղակիորեն մեծ արշավ էր սկսվեր։ Այն ժամանակ խոսակցություններ կային, որ այդ արշավը կազմակերպվել էր Արկադի Ղուկասյանի կողմից, քանի որ ընտրություններից առաջ Հայրապետյանը հրաժարվել էր ֆինանսական աջակցություն ցուցաբերել Ղուկասյանի նախընտրական արշավի համար։ Հայրապետյանի հետ հարաբերությունները բարելավվեցին արդեն Ղուկասյանի պաշտոնավարման վերջին շրջանում։ Իսկ արդեն Բակո Սահակյանի օրոք Լեւոն Հայրապետյանը կրկին դարձավ ԼՂՀ իշխանությունների կողմից ամենասիրված օլիգարխներից մեկը։ Մինչեւ որ խնդիր առաջացավ Գանձասարի պարիսպների վերանորոգման հետ կապված։ Ի դեպ, մի քանի օր առաջ Շվեյցարիայում գտնվող Բակո Սահակյանը հանդիպում էր ունեցել Լեւոն Հայրապետյանի հետ։