Բնակչության բժշկական ապահովագրությունը 5-10 տարում պարտադիր կդառնա. Արա Բաբլոյան

Հասարակություն 28 Հունիս, 2012 14:00

Բժշկական ծառայությունները մարդկանց հասանելի դարձնելու նպատակով բնակչության բժշկական ապահովագրությունը առաջիկա 5-10 տարիներին կդառնա պարտադիր, այս մասին այսօր լրագրողների հետ հանդիպմանն ասաց ԱԺ Առողջապահության, մայրության և մանկության հարցերի մշտական հանձնաժողովի նախագահ Արա Բաբլոյանը։

«Այսօր նոր տեխնոլոգիաները հնարավորություն են տալիս փրկել ավելի մեծ քանակությամբ կյանքեր։ Սակայն դրանց կիրառման հետևանքով բժշկական ծառայությունները թանկանում են։ Բնակչությունը կարիք ունի մատչելի բժշկության։ Մեր ծրագրի նպատակն է այնպես անել, որ նոր տեխնոլոգիաներով բժշկումը հասու լինի հասարակության բոլոր խավերին։ Հենց այս խնդիրների վերացմանն է ուղղված կառավարության կողմից պարտադիր բժշկական ապահովագրություն ներմուծելը»։

Պետության կողմից պետհաստատությունների 120,000 աշխատողի ապահովագրելը ծրագրի առաջին քայլն էր։ Պարոն Բաբլոյանը հույս հայտնեց, որ մասնավոր կազմակերպություններն էլ շուտով կմիանան ծրագրին։

Հասարակության հիմնական հատվածի ապահովագրումը կտևի 5-10 տարի։ Ծրագիրն անընդհատ փոփոխությունների կենթարկվի։

Հարցին, թե ինչն է խանգարում պարտադիր բժշկական ապահովագրության համար օրենքի նախագիծ ընդունելուն, Բաբլոյանն ասաց.

«Ծրագիրն ընդունելու մասին օրենք ես գրել եմ դեռ 1991-1997թթ, երբ Առողջապահության նախարար էի։ Սակայն ծրագիրը կարող էր բացասական ազդեցություն ունենալ նոր զարգացող տնտեսության վրա։ Այդ իսկ պատճառով էլ այն չընդունվեց։ Այժմ տնտեսությունը զարգացել է, և պայմաններ են ստեղծվել ծրագրի իրականացման համար»։

Ինչ վերաբերում է պետպատվերի համակարգի վերացմանը, Բաբլոյանն ասաց, որ այն պետք է լինի ծրագրային ֆինանսավորումների մեջ և կիրառվի միայն քրոնիկ հիվանդությունների համար: Նա նաև կարծում է, որ մասնավոր ընկերությունների՝ իրենց աշխատակիցների հիվանդ լինելը թաքցնելու փորձը և 52 հազար դրամ չվճարելը կվերահսկվի օրենքով։

Ապահովագրական շուկայի մասնակիցների ասոցիացիայի ԻԱՄ տնօրեն Անդրանիկ Օհանջանյանի խոսքով՝ կառավարության այս ծրագիրը կարելի է համարել ստացված։ Վերջին 2 ամիսներին 10 հազար մարդ դիմել է ապահովագրություն ստանալու, իսկ նրանցից 150-ի դեպքում կատարվել են սրտի թանկ վիրահատություններ։