«Շատ երջանիկ եմ Հայաստանի համար, հայ-թուրքական երկխոսության համար կանենք անհրաժեշտ ամեն բան»․ Կարո Փայլան

bianet.org թուրքական կայքին տված հարցազրույցում Թուրքիայի քրդամետ Ժողովրդադեմոկրատական կուսակցության անդամ, պատգամավորի թեկնածու Կարո Փայլանը անդրադարձել է Հայաստանում տեղի ունեցած փոփոխություններին ու պատմել ՀՀ վարչապետ Նիկոլ Փաշինյանի հետ դեռևս անցյալ տարի ունեցած հանդիպման մասին։

Փայլանը հիշում է, որ երբ 2017 թվականի սեպտեմբերին այցելել է Հայաստան, ցանկացել է հանդիպել բոլոր կուսակցությունների ներկայացուցիչների հետ, այդ թվում՝ «Ելք» դաշինքի անդամների, մինչդեռ շատերը պնդել էին, որ դրա կարիքը չկա։

«Ասացին՝ «Նրանք փոքր կուսակցություն են, կարիք էլ չկա հանդիպելու»։ Ես էլ ասացի՝ «Ոչ, դա շատ կարևոր կուսակցություն է, արդարամիտ, հավասարությունը, կանանց իրավունքները պաշտպանող կուսակցություն»։ Փաշինյանի հետ երկար հանդիպում ունեցանք, այդ ժամանակ ասացի՝ «Հայաստանն արժանի է Ձեր կուսակցության պես կուսակցություն ունենալուն»։ Չէի պատկերացնի, որ այսքան արագ կլինի, սակայն 6 ամիս անց իսկապես անարյուն ու ժողովրդավար հեղափոխությամբ նրանք եկան իշխանության, շատ երջանիկ եմ»,- պատմել է Փայլանը։

Հայազգի գործիչն ընդգծել է, որ շատ ոգևորված է վարչապետ Նիկոլ Փաշինյանի՝ Թուրքիայի հետ առանց նախապայմանների երկխոսության գնալու, հարաբերություններ ստեղծելու պատրաստակամությամբ և հույս է հայտնել, որ Թուրքիայում նույնպես կլինի ժողովրդավարական իշխանություն, որը թույլ կտա բացել երկու երկրների սահմանները։

«Մենք պայքարելու ենք դրա համար, և կանենք անհրաժեշտ ամեն բան։ Էրզրումի, Մուշի, Բիթլիսի պատմությունը Երևանի պատմությունից զատել չի կարելի, այդ պատմությունը մեկն է։ Մենք պետք է հաշտեցնենք Անատոլիան պատմական իրողության հետ։ Ազգայնամոլությունն ազգայնամոլություն է ծնում, մինչդեռ Փաշինյանը մերժում է ազգայնամոլությունը, և եթե այստեղ՝ Թուրքիայում էլ ռասիզմը մերժող մտածողություն ձևավորվի՝ ինչո՞ւ չհաշտվենք», - ասել է Փայլանը։

Հիշեցնենք, որ ավելի վաղ տված հարցազրույցներից մեկում Կարո Փայլանը հայտնել էր, որ Թուրքիայում հունիսի 24-ին կայանալիք արտահերթ խորհրդարանական ու նախագահական ընտրություններից հետո ծրագրում է կրկին այցելել Հայաստան ու հանդիպել վարչապետ Նիկոլ Փաշինյանին։