«Մոխրագույնի հիսուն երանգները» էրոտիկ վեպը գերազանցել է «Դա Վինչիի ծածկագիրը» վեպի ռեկորդը

Բրիտանացի կին գրող Է. Լ. Ջեյմսի՝ մեծահասակների համար նախատեսված «Մոխրագույնի հիսուն երանգները» վեպը վաճառքի ռեկորդ է սահմանել փափուկ կազմով գրքերի շարքում։

11 շաբաթվա ընթացքում գիրքը վաճառվել է միլիոն օրինակով։ Նախկինում սահմանված ռեկորդը պատկանում էր Դեն Բրաունի «Դա Վինչիի ծածկագիրը» վեպին, որի միլիոն օրինակ վաճառվել էր 36 շաբաթվա ընթացքում։

Ջեյմսի վեպը նաև ռեկորդ է սահմանել փափուկ կազմով գրքերի շաբաթական վաճառքում` 397,889 օրինակ։ Դա 30,000 օրինակով ավելի է, քան 2008 թվականին Ջոան Ռոուլինգի վեպը։

Ինչպես հայտնում է BBC-ն՝ «Մոխրագույնի հիսուն երանգները» վեպն էրոտիկ եռագրության առաջին մասն է։ Բոլոր երեք վեպերը վարկանիշի առաջին հարյուրյակում ավելի լավ են վաճառվում, քան մնացած գրքերը։ Վաճառքի ծավալներով գիրքը ամենալավ վաճառվող գրքերի ցուցակում (հաշվարկը սկսվել է 1988թ-ից) զբաղեցնում է 32-րդ հորիզոնականը։

Random House հրատարակությունը կոնկրետ տվյալներ չի տրամադրել եռագրության էլեկտրոնային տարբերակի վաճառքի մասին, սակայն հայտնում է, որ տպագիր տարբերակի հետ նույն մակարդակում է գտնվում։

Amazon համացանցային խանութը հայտնել է, որ «Մոխրագույնի հիսուն երանգները» վեպը Kindle էլեկտրոնային գրքի վաճառքի 1 միլիոն օրինակի հասած առաջին գիրքն է։

Դեն Բրաունի և Ջոան Ռոուլինգի ստեղծագործությունները վաճառքի ուրիշ ռեկորդներ ունեն։ 2009թ-ի սեպտեմբերին Բրաունի «The lost symbol» կոշտ կազմով գրքի վաճառքը կազմել է 550,964 օրինակ։ Իսկ Ռոուլինգը մեկ շաբաթում բոլոր ժանրի գրքերի մեջ վաճառքի ռեկորդ է սահմանել։ Հարրի Փոթերի մասին վերջին 3 գրքերի շարքի վաճառքը հասել է 1.8 և 1.4 միլիոնի (5-րդ և 6-րդ մասերը ներառյալ)։

«Մոխրագույնի հիսուն երանգները» վեպը պատմում է միլիարդատեր Քրիստիան Գրեյի եւ բանասիրական ֆակուլտետի անմեղ ուսանողուհի Անաստասիա Սթիլի բուռն փոխհարաբերությունների մասին։