«Իմ Հայաստան» համահայկական փառատոնի բացումն այսօր է

Այսօր ժամը 21.00-ին Երևանի Կասկադ համալիրում տեղի կունենա ՀՀ սփյուռքի նախարարության «Իմ Հայաստան» համահայկական փառատոնի հանդիսավոր բացման արարողությունը, որին ներկա կգտնվեն ՀՀ կառավարության անդամներ, ՀՀ ԱԺ պատգամավորներ, պետական, մշակութային գործիչներ, մտավորականներ և այլ հյուրեր:

Միջոցառման շրջանակներում ելույթ կունենա տարբեր երկրներից Հայաստան ժամանած 11 պարախումբ։ Համերգային ծրագրին կմասնակցեն նաև կատարողներ Հայաստանի Հանրապետությունից և Լեռնային Ղարաբաղի Հանրապետությունից:

Փառատոնի ընթացքում խմբերը համերգային ծրագրերով հանդես կգան ոչ միայն Երևանում, այլև Շիրակի, Լոռու, Տավուշի, Գեղարքունիքի, Արագածոտնի, Արմավիրի, Սյունիքի, Կոտայքի, Արարատի, Վայոց ձորի մարզերում և Լեռնային Ղարաբաղի Հանրապետությունում:

Փառատոնի նպատակներն ու խնդիրներն են՝ Հայաստան-Արցախ-Սփյուռք կապերի և համագործակցության հնարավորությունների ընդլայնումը, հայ մշակույթի և մշակութային ինքնության պահպանմանն ու զարգացմանը նպաստելը, համագործակցության նոր ձևաչափերի ձևավորմանն աջակցելը, Հայաստանի և Սփյուռքի երիտասարդ ստեղծագործողների միջև մշակութային կապերի խորացմանը, համատեղ ծրագրերի մշակմանը և իրականացմանը սատարելը, ժամանակակից հայ արվեստի զարգացմանն ու գովազդմանն օժանդակելը, մշակույթի ոլորտում համահայկական մասնագիտական ներուժի հայտնաբերմանն ու համախմբմանը նպաստելը։