Ի՞նչ են նշանակում համընդհանուր խուզարկություններն ու ձերբակալությունները. մեկնաբանում է իրավապաշտպանը

Վերջին օրերին ՀՀ-ում ԱԱԾ-ն և Ոստիկանության հատուկ ծառայության ուժերն իրականացնում են լայնածավալ ստուգողական աշխատանքներ։ Իրար hետևից ի հայտ են գալիս ապօրինություններ, բացահայտվում են քրեական հեղինակություններ։ Այս և թեմային առնչվող այլ հարցերի շուրջ  ԼՈւՐԵՐ.com-ի թղթակիցը զրուցեց իրավապաշտպան Արթուր Սաքունցի հետ։

-Ինչպե՞ս կգնահատեք ԱԱԾ-ի և Ոստիկանության վերջին գործողությունները, մասնավորապես, քրեական հեղինակություններին «ջրի երես» հանելը։

-Քրեական հեղինակությունները բացահայտված էին վաղուց, ավելին՝ ոչ միայն բացահայտված էին, այլև օրը ցերեկով գործում էին քաղաքական իշխանության հետ համագործակցված։ Այդ համագործակցությունը դրսևորվում էր քաղաքական ուժերի հետ ապօրինի, բռնի գործողություններին կատարմամբ՝ հատկապես ընտրությունների և ցույցերի իրականացման ժամանակահատվածում։ Այսինքն, այնպես չէ, որ նոր ի հայտ եկան կամ հայտնի չէին, պարզապես քաղաքական իշխանության հետ սերտաճած, համագործակցված գործում և ազատ ապրում էին ՀՀ-ում, այնքան ժամանակ, քանի դեռ  ձեռնտու էին Սերժ Սարգսյանի իշխանությանը։ Այժմ քաղաքական իշխանությունը, թավշյա հեղափոխությունից հետո, բոլորովին այլ արժեհամակարգ, բոլորովին այլ սկզբունքներ ունի, իսկ այդ ամենի հիմքը  հանդիսանում է ՀՀ Սահմանդրությունը՝ որպես իրավական, որպես ժողովրդավարական, որպես ոչ կրիմինալ, ոչ կոռուպցիոն պետություն։ Ելնելով այդ տրամաբանությունից՝ ԱԱԾ-ն իրականացնում է գործողություններ։ Ի դեպ, մենք բազմիցս բարձրաձայնում էինք թե՛ Սերժ Սարգսյանի, թե՛ Ռոբերտ Քոչարյանի սերտաճվածության մասին քրեական աշխարհի ներկայացուցիչների հետ, որը բացարձակապես որևէ արձագանք չէր ստանում իրավապահ մարմինների կողմից։

-Վերջին գործողությունների արդյունքում շատ անհատների մոտ հայտնաբերվեց մեծ քանակությամբ զենք-զինամթերք։ Բացի քրեական հեղինակություներից՝ զենքեր ունեին նաև որոշ քաղաքական գործիչներ, ինչպես, օրինակ, ՀՀ նախագահի նախկին վերահսկողական ծառայության պետ Հովհաննես Հովսեփյանը։ Ինչո՞վ է սա պայմանավորված։ Հայաստանում ապրելն այնքան վտանգավո՞ր է, որ անհատներն ունեն ինքնապաշտպանության կարիք։

-Հայաստանում ինքնապաշտպանության կարիք չկա, պարզապես կար զենք կրելու մենաշնորհ քաղաքական իշխանության ձեռքին։ Բոլոր հայտնի օլիգարխիկ դեմքերը, որոնց հիման վրա կառուցված էր նախկին քաղաքական իշխանության գոյությունը, զինվում էին ժողովրդի դեմ։ Մարտի 1-ին 35-ից ավելի քրեական խմբավորումներ են եղել․ տարբեր խմբավորումներ՝  օլիգարխների, պատգամավորների, նրանց թիկնապահների կողմից կազմված։ Բա այդ զենքը որտեղի՞ց վերցրին․ զենքը ունեին ի սկզբանե, և բազմիցս այդ մասին ասվել է։ Ունեցել են անպատժելի կարգավիճակ․ թույլատրված էր ամեն ինչ ունենալ և ձեռք բերել ապօրինի միայն մեկ պայմանով, այն է՝ ծառայել Սերժ Սարգսյանի, Ռոբերտ Քոչարյանի իշխանությանը։

-Ժամանակին Վրաստանի նախկին նախագահ Միխեիլ Սաակաշվիլին, երբ նոր էր եկել իշխանության, նմանատիպ պայքար էր տանում: Մեր իրականության մեջ այս ամենը հիշեցնում է նաև Վանո Սիրադեղյանի՝ երբեմնի իրականացարած պայքարը հանցավորության դեմ։ Կարո՞ղ ենք արդյոք Նիկոլ Փաշինյանի որդեգրած քաղաքական այս գիծը համեմատել այդ երկու դեպքերի հետ։

-Ի տարբերություն Վանո Սիրադեղյանի կամ Սաակաշվիլիի, Նիկոլ Փաշինյանը գործում է բացառապես օրենքի շրջանակներում։ Նրա  վարած քաղաքականության մեջ ոչ թե ընկած է արևմտամետ կամ ռուսամետ սկզբունքեր, այլ ընկած է ՀՀ Սահմանադրության իրականացումը, ապահովումը, այն է՝ իրավական, ժողովրդավարական և ինքնիշխան պետություն։ Քրեական աշխարհի դեմ պայքարը բացառապես իրականցվում է օրենքի շրջանակներում, որը չկար ո՛չ Վանո Սիրադեղյանի, ո՛չ Սաակաշվիլիի ժամանակ։

Հարցազրույցը վարեց Լիլիթ Հակոբյանը: