Հանրային խորհրդի կազմը չի ներկայացնում մտավորականության կարծիքը. Հաղթանակ Շահումյան

Բանաստեղծուհի Մարինե Պետրոսյանը և նկարիչ Հաղթանակ Շահումյանն այսօր լրագրողների հետ հանդիպմանը անդրադարձան եթերային քաղաքականությունը փոխելու վերաբերյալ Ս.Սարգսյանի հանձնարարականին: Բանախոսներից Մարինե Պետրոսյանը նշեց, որ այս արշավից հեռուստատեսությունը օգուտ չի ունենա, հակառակը՝ կտուժի: Իսկ Հաղթանակ Շահումյանը նշեց, որ իր մտահոգությունն այն է, որ այսօր հեռուստատեսությունը վատ վիճակում է և կարիք ունի շտկվելու, ինչը բոլորիս խնդիրն է:

Բանախոսները խնդրի վերաբերյալ ներկայացրեցին իրենց առաջարկները: Մարինե Պետրոսյանի առաջարկն ուղղված էր այդ արշավում գտնվող մարդկանց. «Այն մարդիկ, ովքեր անկեղծ են և ում պատկերացումներն իսկապես կարող են ինձ հարազատ լինել, իսկապես ունեն արվեստի կամ հեռուստատեսության մասին սեփական պատկերացումը և ուզում են դրան հասնել։ Ես առաջարկ անեմ՝ պետք չէ կենտրոնանալ հանրային և մյուս՝ մասնավոր հեռուստատեսությունների վրա: Այսօր ինտերնետն է հիմնականը, և հեռուստատեսությունը տեղափոխվում է ինտերնետ։ Այնտեղ շատ ավելի հեշտ է փոքր ուժերով անել այն, ինչ ուզում ես: Արդեն պետք է բացել ինտերնետ-հեռուստատեսություներ և ստեղծել այն հեռուստատեսությունը, որն ուզում ենք և օրինակի վրա ցույց տալ, թե ինչ ենք իրականում ուզում», - նշեց Պետրոսյանը:

Մյուս բանախոս Հաղթանակ Շահումյանը նշեց, որ հանրային խորհրդում տվյալ քննարկումը չպետք կաբինետային լինի: «Ես հանրային խորհրդի ակտիվ գործունեություն չեմ տեսել և կցանկանայի, որ այդ քննարկմանը ներկա լինեին նաև արվեստի մարդիկ: Հանրային խորհրդի կազմը չի ներկայացնում մեր երկրի մտավորականության կարծիքը։ Ես դրանում վստահ եմ: Կարծում եմ պետք է լինեին խոշոր դեբատներ»,- նշեց Շահումյանը:

Հիշեցնենք, որ մի շարք մտավորականների և հասարակական կազմակերպությունների ներկայացուցիչներ Ս.Սարգսյանին նամակ էին ուղարկել, որով նրանք իրենց մտահոգությունն են հայտնում հեռուստաեթերի ագրեսիվ, քրեածին և հակասոցիալական բովանդակության վերաբերյալ: Ս.Սարգսյանը, կարևորելով բարձրացված խնդիրները, հանձնարարել է Հանրային խորհրդին զբաղվել հարցի կարգավորմամբ։