ԱՄՆ պետդեպը հորդորել է քաղաքացիներին նախազգուշանալ Թուրքիայում ահաբեկչության վտանգից

Միացյալ Նահանգների պետդեպարտամենտը նոր նախազգուշացում է հրապարակել Թուրքիա այցելել ցանկացող ԱՄՆ քաղաքացիների համար: Պետդեպ հայտարարության մեջ նշվում է, որ Թուրքիայի որոշ հատվածներում մեծացել է ահաբեկչության վտանգը:

Մասնավորապես, ԱՄՆ-ից հորդորել են քաղաքացիներին չայցելել Թուրքիայի հարավ-արևմտյան, Սիրիայի հետ սահմանակից հատվածներ, որտեղ կա ահաբեկչության մեծ վտանգ: «Ահաբեկչական խմբավորումները մտադրված կերպով թիրախավորում են Արևմտյան երկրներից այցելող զբոսաշրջիկներին: Նրանք կարող են հարձակումներ իրականացնել զբոսաշրջային տեղանքների, տրանսպորտային հանգույցների, առևտրի կենտրոնների, ժամանցային վայրերի վրա»,- ասվում է պետդեպ հայտարարության մեջ՝ նշելով, որ ԱՄՆ կառավարությունը սահմանափակ հնարավորություններ ունի արտակարգ ծառայություններ մատուցել Թուրքիայի հարավ-արևելք ճամփորդող իր քաղաքացիներին, քանի որ ԱՄՆ կառավարությունը սահմանափակումներ է մտցրել իր աշխատակիցների՝ այդ շրջաններ այցելելու գործում:

ԱՄՆ արտաքին քաղաքական գերատեսչությունից հայտնել են նաև, որ Թուրքիայում շարունակվող արտակարգ դրության պայմաններում անվտանգության ուժերը բերման են ենթարկել տասնյակ հազարավոր անհատների, այդ թվում և ԱՄՆ քաղաքացիների, ովքեր մեղադրվում են ահաբեկչական կազմակերպությունների հետ առնչություններ ունենալու մեջ,  ինչը, ամերիկյան կողմի գնահատմամբ, շատ հաճախ քաղաքական շարժառիթների ունի:

Պետդեպարտամենտը հորդորել է Թուրքիա այցելել պատրաստվող քաղաքացիներին զգուշ լինել հայտնի զբոսաշրջային վայրերում գտնվելուց, խուսափել ցույցերին մասնակցելուց, հետևել տեղական մեդիային ու պետդեպ հրապարակումներին: