Լոռու մարզպետն ու փոխմարզպետը ոչ մի կերպ լեզու չեն գտնում

Լոռու փոխմարզպետ, «Քաղաքացիական պայմանագիր» կուսակցության անդամ Անդրեյ Ղուկասյանի և  ԲՀԿ-ական մարզպետ Հրանտ Մարգարյանի  աշխատանքային հարաբերությունները հեռու են իդեալականից։ Փոխմարզպետը մարզպետին մեղադրում է պաշտոնեական դիրքը չարաշահելու մեջ։ Ըստ փոխմարզպետի՝ մարզպետ Հրանտ Մարգարյանը Սպիտակի ու մարզի մի քանի այլ բնակավայրերի ԲԿ-ների  տնօրեններից պահանջում է աշխատանքից ազատվելու դիմումներ գրել, որպեսզի նրանց փոխարեն նշանակի իր համակիրներին: Այս մասին Ղուկասյանն ասել է նաև նախօրեին լրագրողների հետ հանդիպման ժամանակ։ Ստեղծված ոչ աշխատանքային մթնոլորտի մասին  ԼՈւՐԵՐ․com- ի թղթակիցը զրուցել է Անդրեյ Ղուկասյանի հետ։

-Պարո′ն Ղուկասյան, արդյո՞ք Ձեր կողմից հնչեցված հայտարարությունները չեն անդրադարձել Ձեր և մարզպետի հարաբերությունների վրա։

-Ճիշտն ասած, դրանից հետո չենք հանդիպել։ Մարզպետը Երևանում է։ Իմ  կողմից տրամադրվածությունը դրական է, և ես իմ աշխատանքները նորմալ ձևով կազմակերպում եմ։

-Ինչպե՞ս եք պատկերացնում Ձեր հետագա համագործակցությունը, երբ նշել եք, որ մարզին վերաբերող աշխատանքների միայն 10%-ն է վստահված Ձեզ և մյուս փոխմարզպետին։

-Եթե որոշումը չփոխվի և վերաբաժանում չկատարվի, բնականաբար, ես այս 10%-ի շրջանակներում կարող եմ հսկողություն իրականացնել և գործողություն ծավալել, իսկ մնացած բաժիններում միջամտելու հնարավորությունը պակասում է։

-Նշել եք, որ առողջապահության ոլորտը, որպես բժիշկ, նպատակահարամար էր, որ Ձեզ տրամադրեին, մինչդեռ, ըստ Ձեր խոսքերի, ամենակոռուպացված բնագավառը մարզպետը ցանկանում է իր հսկողության տակ պահել։ Կարո՞ղ եմ ենթադրել, որ անուղղակիորեն մարզպետին մեղադրում եք կոռումպացված լինելու մեջ։

-Ենթադրություն չեմ կարող անել, սակայն, եթե հանկարծ լինեն կոռուպցիոն դրսևորումներ՝ բնականաբար, իմանալու դեպքում կբարձրաձայնեմ։ Չեմ կարող ասել, թե այդ ոլորտն ինչու է որոշել պահել իր մոտ, գուցե՝ որ ավելի լավ հսկողություն իրականացնի կամ՝ ինքն ավելի շատ է տեղյակ առողջապահությունից․ հնարավոր է՝ ինքն այդպես է կարծում։

-Մինչ Լոռու մարզպետի անունը հայտնի դառնալը լուրեր էին պտտվում, որ Դուք կարող եք լինել այդ պաշտոնում։ Հնարավո՞ր է, որ սա է նստվածք թողել և անդրադարձել Ձեր հարաբերությունների վրա։

-Ես բժիշկ եմ և իմ մասնագիտությունը շատ եմ սիրում. թե′ մարզպետի, թե′ փոխմարզպետի պաշտոնն ինձ համար բեռ է։

-Այդ դեպքում ինչո՞ւ եք համաձայնել աշխատել որպես փոխմարզպետ։

-Երբ լինում ես թիմի անդամ, և թիմն իր վրա վերցնում է մեծ պատասխանատվություն, այդ վիճակում թողնել թիմն ու պատասխանատվությունից խուսափել՝ իմ կարծիքով, սխալ է։ Միայն և միայն աջակցելու համար է։

—Իսկ հնարավո՞ր է, որ սա ոչ թե Ձեր և մարզպետի խնդիրն է, այլ երկու քաղաքական թիմերի՝ ԲՀԿ-ականների և ԵԼՔ-ականների հակասությունն է։

-Ինձ համար կուսակցական պատկանելությունն էական չի, որովհետև մարզպետարանում շատ կան ՀՀԿ-ից աշխատակիցներ, և ես նորմալ աշխատակցի հետ որևէ խնդիր չունեմ։ Բնականաբար, կուսակցական պատկանելությունը կապ չունի այստեղ։

-Պարո′ն Ղուկասյան, ստեղծված իրավիճակում, երբ  Դուք բացահայտ կոչ եք արել իրավապահներին՝ զբաղվել մարզպետի՝ պաշտոնեական դիրքի չարաշահումներով, ինչպե՞ս եք պատկերացնում Ձեր հետագա աշխատանքը միասին։

-Այո′, հնարավոր է՝ միայն օրինականության շրջանակներում։ Պարտադիր չէ, որ մարզպետի հետ շատ լավ հարաբերությունների մեջ լինեմ, միասին տարբեր գործերով զբաղվենք, կարող ենք պարզապես գործնական հարաբերությունների մեջ լինել։

Լիլիթ Հակոբյան