ԼՂՀ-ի արտաքին քաղաքական ուղեգծի մասին բոլոր թեկնածուների մոտեցումները նույնն են. Վալերի Խաչատրյան

Lurer.com-ը նախընտարական քարոզարշավի ընթացքի վերաբերյալ զրուցեց Արցախում նախագահի թեկնածու Վալերի Խաչատրյանի հետ։ Վերջինս տեղեկացրեց, որ առայժմ չի այցելել ոչ մի բնակավայր ու հանդիպում չի ունեցել արցախցիների հետ, հանդիպումները նախատեսված են հուլիսի մեկից հետո՝ նախքան թեկնածուի՝ քարոզչությունը հեռուստատեսությամբ և ռադիոյով իրականացնելը։

Թեկնածուն չունի նախընտրական շտաբեր, նրա խոսքով՝  արցախցիներին լավ ճանաչելու շնորհիվ ինքը իրականացնում է արդյունավետ քարոզչություն. այն, ինչ սահմանված է անել 30 օրում, ինքը կարող է անել 15-ում։  

Իսկ այն հարցին, թե արդյոք թեկնածուն իր նախընտրական ծրագրում ընդգրկել է այնպիսի կետ, որը չի հանդիպում այլ թեկնածուների  ծրագրերում, Վիտալի Խաչատրյանը պատասխանեց՝ իր նախըտրական ծրագրում առկա են տարբեր ոլորտներ, իսկ երկրի արտաքին քաղաքական ուղեգծի մասին բոլոր թեկնածուների մոտեցումները նույնն են։

Թեկնածուն նշեց, որ Բակո Սահակյանը իր քարոզչության հիմքում դրել է վերջին հինգ տարվա արածների ներկայացումը, իսկ ահա ինքը և մյուս թեկնածուները ներկայացնում են միայն անելիքները՝ չնայած ինքը իր կեսդարյա աշխատանքի ընթացքում 35 տարի աշխատել է գործադիր և օրենսդիր մարմիններում, եղել է ԼՂՀ երկրորդ գումարման ԱԺ պատգամավոր, 17 տարի՝ ԼՂՀ ԱԺ-ի ընդհանուր բաժնի վարիչ և քաջատեղյակ է արցախցիների խնդիրներին։