Իսրայելն օգնում է Բաշար Ասադին

«Թուրքիան անտարբեր չի Սիրիայում տիրող իրավիճակի հարցում, սակայն պաշտոնական Անկարան չի աջակցում երրորդ երկրների միջամտությունը Սիրիայի ներքին կյանքին և չի հետապնդում նման քաղաքականություն», – հայտարարել է Թուրքիայի նախագահ Աբդուլլահ Գյուլը Լոնդոնում։ Ըստ Թուրքիայի նախագահի՝ Թուրքիան կորցրել է իր վստահելիությունը նախկին դաշնակցի՝ Սիրիայի և նախագահ Բաշար Ասադի ռեժիմի նկատմամբ։

«Մեր ժամանակներում ավտորիտար ռեժիմները՝ ինչպիսին որ Բաշար Ասադի իշխանությունն է, անընդունելի են և գտնվում են փակուղում», - ասել է Գյուլը: Չնայած այն հանգամանքին, որ Սիրիայում տիրող իրավիճակը զարգանում է վատագույն սցենարով, այնուամենայնիվ, Թուրքիան չի միջամտի Սիրիայի ներքին գործերին։ «Մենք չենք ցանկանում միջամտել Սիրիայի ներքին գործերին։ Սակայն, մենք անտարբեր էլ չենք մնալու։ Եթե նման իրավիճակը սպառնա նաև Թուրքիայի շահերին, ապա մենք ստիպված կլինենք ինքներս մեզ պաշտպանել»,- ասել է Գյուլը:

Մինչդեռ, թուրքական «Sabah» թերթը, վկայակոչելով հետախուզության գործակալությունների իր աղբյուրներին, հայտնում է, որ Սիրիան սերտորեն համագործակցում է Իսրայելի հետ՝ ընդդիմությանը ճնշելու հարցում։ Ըստ թերթի՝ իսրայելական անօդաչու ինքնաթիռները հետախուզական գործողություններ են իրականացնում Սիրիայի օդային տարածքում և տիրապետում են Սիրիայիում տիրող իրավիճակի մասին տեղեկությունների։ Թերթը նաեւ նշում է, որ նոյեմբերի 11-ին Ադանայում անօդաչու ինքնաթիռը վթարի է ենթարկվել՝ Սիրիայի Հաթայ քաղաքում գտնվող ռազմական ճամբարի վերաբերյալ հետախուզական գործողություններ իրականացնելու պահին։ Հաղորդում է Regnum լրատվական գործակալությունը։