Apple-ը երկրորդ անգամ hաղթում է Samsung-ին

Ըստ Associated Press-ի՝ Apple ընկերությունը արդեն 2-րդ անգամ դատական հաղթանակ է տանում hարավկորեական Samsung Electronics ընկերության կողմից թողարկվող Samsung Galaxy Nexus սմարթֆոնի նկատմամբ՝ արգելելով վերջինիս վաճառքը ԱՄՆ տարածքում:
Այս շաբաթվա ընթացքում Apple-ի տարած 2-րդ դատական հաղթանակի ժամանակ Հուսիսային Կալիֆոռնիայի տարածքային դատարանը հայտնեց, թե Galaxy Nexus սմարթֆոնը «մասնակիորեն» խախտում է Apple ընկերությանը պատկանող թվով 4 պատենտների հանդեպ ունեցած իրավունքը՝ ներառյալ iPhone 4S սմարթֆոնի համակարգում առկա Siri ձայնային ակտիվացման օժանդակության հնարավորության պատենտը:

«Apple ընկերությունը պարզ կերպով ապացուցեց, որ առանց նախնական արգելքի կիրառման անդարձելի կորուստներ կկրի հեռախոսների ամերիկյան շուկայում», - ասել է դատավոր Լյուսի Կոն: Նա նաև պահանջեց, որպեսզի Apple-ը 96 մլն դոլարի պարտատոմս թողարկի, այն դեպքում, եթե iPhone արտադրողը դատական պարտություն կրի Samsung ընկերության դեմ հետագա դատավարության ժամանակ, որը նախատեսած է 2014 թվականին: Վերոնշյալ գումարը հաշվարկված վնասի չափն է, որը գոյացել է Samsung հեռախոսների վաճառքից, նախքան ժամանակավոր արգելափակման մասին որոշումը:

Galaxy Nexus –ի դատավարությունը Apple և Samsung ընկերությունների միջև իրավական բախումներից հերթականն էր: Ընթացիկ տարվա առաջին եռամսյակի տվյալներով՝ աշխարհի ամենախոշոր սմարթֆոն արտադրող այս երկու ընկերությունները միասին գրավում են սմարթֆոնների համաշխարհային շուկայի ավելի քան կեսը:

Apple և Samsung ընկերությունների միջև բազմիցս դատավարություններ են տեղի ունեցել ասիական և եվրոպական տարածաշրջաններում, ինչպես նաև հյուսիսամերիկյան մայրցամաքում՝ սկսած 2011 թվականի ապրիլ ամսից, երբ Apple-ը մեղադրեց Samsung-ին iPhone և iPad շարժական սարքավորումների կրկնօրինակման մեջ: Ի պատասխան այս մեղադրանքների՝ Samsung-ը մեղադրանք առաջադրեց, թե Apple-ը առանց թույլատվության օգտագործում է իր բջջային տեխնոլոգիաները:

Հիշեցնենք, որ առաջին դատական հաղթանակը ընդդեմ Samsung-ի Apple–ը տարավ այս շաբաթ, որի արդյունքում Կալիֆոռնիայի դատարանը ժամանակավորապես արգելեց Samsung Galaxy Tab 10.1 թաբլեթ-համակարգչի վաճառքը Միացյալ Նահանգներում: Apple ընկերությունը նպատակ ունի նաև սահմանափակել Google-ի Android օպերացիոն համակարգի կիրառման աննախադեպ աճը, որը, փաստորեն, աշխարհում շարժական սարքավորումների ամենաօգտագործվող օպերացիոն համակարգն է:

Samsung ընկերության ներկայացուցիչները հայտնել են, թե հիասթափված են դատարանի կայացրած վճռից: «Samsung-ը կշարունակի ձեռնարկել բոլոր հնարավոր միջոցները՝ վերականգնելու Galaxy Nexus սմարթֆոնի վաճառքը ԱՄՆ-ում և այն հասանելի դարձնել ամերիկացի գնորդներին», - հայտարարել է Samsung ընկերության խոսնակ Նամ Քի-Յունգը:

Դատավարության կապակցությամբ, սակայն, Apple-ը զերծ է մնում հայտարարությամբ հանդես գալուց: