Ինչպիսի՞ իրավիճակ է «Հարսնաքարում» միջադեպից հետո

Lurer.com-ը երեկ փորձեց պարզել, թե ինչպիսի իրավիճակ է «Հարսնաքարում»՝ միջադեպից հետո: Մեզ չհաջողվեց զրուցել ռեստորանի տնօրենի և օրվա պատասխանատու մենեջերի հետ, սակայն մենք զրուցեցինք «Հարսնաքարի» մեկ այլ մենեջերի հետ, ով, իր խոսքերով, նոր էր վերադարձել Հայաստան և շատ բաներից տեղյակ չէր: Հարցազրույցը ներկայացնում ենք ստորև.

Հարսնաքարում հունիսի 17-ի դեպքից հետո քանի՞ միջոցառում է իրականացվել:

-Մոտավորապես տասնհինգ օր ընդհանրապես աշխատանքի չեմ գնացել, քանի որ Հայաստանում չեմ եղել, այդ պատճառով որևէ ստույգ տեղեկատվություն տալ չեմ կարող:

Հարսնաքարում միջադեպից հետո իրավիճակն ինչպիսի՞ն է։

-Դե մի փոքր լարված։

Անվտանգության նոր աշխատակիցներ ընդունվե՞լ են աշխատանքի։

-Ո՛չ։

Հայտարարություն արվե՞լ է, որ Հարսնաքարին անվտանգության աշխատակիցներ են հարկավոր։

-Ես տեղյակ չեմ, պետք է, որ արված լինի:

Փաստորեն ռեստորանն այժմ գործում է առանց անվտանգության աշխատակիցների՞։

-Միգուցե: Ես, որ երեկ եմ եկել, շատ բաներից տեղյակ չեմ:

Հիշեցնենք, որ հունիսի 17-ի գիշերվա 23:00-ին ՀՀ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի անվտանգության աշխատակիցները ծեծի էին ենթարկել ՀՀ ՊՆ Երևանի կայազորի հոսպիտալի քիթ–կոկորդ–ականջ բաժանմունքի պետ, մայոր Վահե Ավետյանին, որին տեղափոխել էին «Մուրացան» զինվորական հոսպիտալ։ Իսկ երեկ 19.00-ի սահմաններում Վահե Ավետյանը մահացավ:

Ազատուհի Արասխանյան