Շոու բիզնեսի ներկայացուցիչները՝ Վահե Ավետյանի հիշատակին նվիրված մոմավառության մասին

Այսօր ժամը 21:00–ին «Հարսնաքար» ռեստորանային համալիրի դիմաց (Ավան վարչական շրջան) կազմակերպվել է մոմավառություն՝ ի հիշատակ Վահե Ավետյանի։ Լուրեր.com-ը զրուցեց շոու բիզնեսի ներկայացուցիչների հետ, ճշտելու համար՝ նրանք մասնակցելո՞ւ են այսօրվա մոմավառությանը, թե՞ ոչ:

Երգչուհի Հասմիկ Կարապետյանը նշեց, որ շատ է ցավում միջադեպի համար, բայց համերգների է մեկնում, և դժվար թե կարողանա մասնակցել մոմավառությանը:

Երգիչ Արսեն Գրիգորյանն էլ (Մրո) նշեց, որ ինքը «միջոցառում ունի», բայց հոգով-սրտով բոլորի հետ է լինելու:

«Հարսանիք կա, իմ բարեկամների հարսանիքն է, թե չէ ես մեծ սիրով իրենց հետ կլինեի»,- ասաց Գրիգորյանը:

«Էմփիրեյ» խմբի անդամ Գիսանե Պալյանն էլ իր հերթին նշեց, որ քաղաքում չլինելու պատճառով չի մասնակցելու մոմավառությանը, իսկ «Էմփիրեյ» խմբի մենակատար Սարգիս Մանուկյանը՝ թե կցանկանար մասնակցել, բայց ֆիզիկապես չի կարող: Մանուկյանը ավելացրեց նաև, որ Վահե Ավետյանի թաղմանը կմասնակցի:

«Պարի և հուգու թատրոնի» ղեկավար Սոֆի Դևոյանն էլ մեզ հետ զրույցում նշեց, որ հիվանդացել է և ցավոք մասնակցել չի կարող։ Նա նաև տեղեկացրեց, որ երգչուհի Զարուհի Բաբայանը քաղաքում չէ:

Երգչուհի Նադեժդա Սարգսյանը ևս առողջական խնդիրներ ունի. «Հաճույքով, բայց չեմ կարող, իսկ Էմմին Թբիլիսիում է, վաղը երեկոյան նոր կվերադառնա»,- ասաց նա:

Հիշեցնենք, որ «Պահանջում ենք պատժել «Հարսնաքարում» տեղի ունեցածի բոլոր մեղավորներին» ֆեյսբուքյան նախաձեռնությունը կազմակերպել է մոմավառություն՝ ի հիշատակ Վահե Ավետյանի։

Մոմավառությունը նախատեսված է այսօր ժամը 21:00–ին՝ Հանրապետական կուսակցության ներկայացուցիչ, ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի դիմաց (Ավան վարչական շրջան)։

Վերստին հիշեցնենք, որ երեկ ժամը 19.00-ի սահմաններում մահացել է ՊՆ կենտրոնական կայազորի ռազմական հոսպիտալի քիթ–կոկորդ–ականջ բաժանմունքի պետ, բուժծառայության մայոր Վահե Ավետյանը։ Հունիսի 17-ի գիշերվա 23:00-ին ՀՀ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի անվտանգության աշխատակիցները ծեծի էին ենթարկել ՀՀ ՊՆ Երևանի կայազորի հոսպիտալի քիթ–կոկորդ–ականջ բաժնի պետ, մայոր Վահե Ավետյանին, որին տեղափոխել էին «Մուրացան» զինվորական հոսպիտալ։