«Նեմեց, մարդասպան», «Նեմեց, հեռացիր», «Ես Վահե Ավետյանն եմ»

«Պահանջում ենք պատժել «Հարսնաքարում» տեղի ունեցածի բոլոր մեղավորներին» ֆեյսբուքյան նախաձեռնությունն այսօր մոմավառություն էր կազմակերպել՝ ի հիշատակ «Հարսնաքարում» դաժան ծեծից մահացած Վահե Ավետյանի:

ԱԺ պատգամավոր Ռուբեն Հայրապետյանին պատկանող «Հարսնաքար» ռեստորանային համալիրի մոտ հավաքված էին հարյուրավոր քաղաքացիներ։ Նրանք «Վահե Ավետյանը ես եմ», «Չեք մարսելու» և այլ մակագրություններով պաստառներ և մոմեր էին բռնել։ Ակցիային մասնակցում էին ԱԺ պատգամավորներ և որոշ կուսակցությունների ներկայացուցիչներ՝ Անահիտ Բախշյանը, Արմեն Մարտիրոսյանը, Զարուհի Փոստանջյանը, Հովսեփ Խուրշուդյանը, Լիլիթ Գալստյանը, Հրայր Կարապետյանը, Արմեն Ռուստամյանը, Լևոն Զուրաբյանը և այլք։ Ներկա էին նաև բազմաթիվ հասարակական կազմակերպությունների ներկայացուցիչներ։ Ակցիայի մասնակիցները, ովքեր սկզբում կանգնած էին փողոցում՝ «Հարսնաքարի» դիմաց, սկսեցին մոտենալ և իրենց ձեռքերի մոմերը դնել ռեստորանի պատերի տակ։ Ի դեպ, «Հարսնաքար» համալիրի պատերին կային «Սպանդանոց» և «Հանցաքար» գրություններ։

Սգո և ոգեկոչման լուռ ակցիան վերածվեց ցույցի, երբ մասնակիցները, վրդովված ռեստորանում շարունակվող միջոցառումից, փորձեցին մտնել ներս։ Պարզվեց՝ ռեստորանային համալիրը մոմավառության մասնակիցներից պաշտպանելու համար անգամ կարմիրբերետավորներ են ժամանել։ Ոստիկանների և ակցիայի մասնակիցների միջև տեղի ունեցած բախումից զայրացած մասնակիցներն սկսեցին վանկարկել «Նեմեց, մարդասպան», «Նեմեց, հեռացիր», «Ես Վահե Ավետյանն եմ», «Նեմեցի ոստիկաններ», «Դուք թուրք եք» և այլն։

Ակցիայի մասնակիցներին ցրել չկարողացավ անգամ հորդ անձրևը. ցուցարարները կանգնած մնացին «Հարսնաքարի» դիմաց՝ ձեռքերով անձրևից պաշտպանելով իրենց վառվող մոմերը։

«Պահանջում ենք պատժել «Հարսնաքարում» տեղի ունեցածի բոլոր մեղավորներին» ֆեյսբուքյան նախաձեռնության կազմակերպիչները հայտարարեցին, որ բողոքի ակցիանեն այսքանով չեն սահմանափակվելու։ Հաջորդ ակցիան տեղի կունենա հենց վաղը՝ հուլիսի 1-ին՝ ժամը 13.00-ին նախագահի նստավայրի դիմաց։