Մշակույթի նախարարության ծրագրի նպատակն է ապահովել թատրոն-մանկահասակ հանդիսական կապը

ՀՀ Մշակույթի նախարարության ֆինանսավորմամբ 2007 թվականից իրականացվող «Հեքիաթին հյուր» նպատակային մարզային ծրագիրն այս տարի իրագործում է «Խալդ» բարեգործական հասարակական կազմակերպությունը և այն անց է կացվում ՀՀ Տավուշի մարզում: «Հեքիաթին հյուր»  ծրագրի շրջանակներում ռեժիսոր-բեմադրիչ, ՀՀ արվեստի վաստակավոր գործիչ Գ. Պողոսյանը բեմադրել է «Էս էն գյուղն է, որ...» հեքիաթ-պիեսը` Հովհ. Թումանյանի «Շունն ու կատուն», «Խոսող ձուկը» և «Քեֆ անողի քեֆը չի պակասիլ» ստեղծագործությունների հիման վրա: Այն նվիրվում է «Շունն ու կատուն» բալլադի ստեղծման 125-ամյակին: 

Ծրագրի նպատակն է ապահովել թատրոն-մանկահասակ հանդիսական կապը, նպաստել մանուկների գեղագիտական դաստիարակությանն ու ապագա թատերասեր հանդիսատեսի ձևավորմանը, ներկայացումը ցուցադրել ՀՀ Տավուշի մարզի շուրջ 59 համայնքներում և գյուղերում, այդ թվում` անվճար սպասարկել մարզի անապահով ընտանիքների, մանկատների և հատուկ խմբերի երեխաներին: Ծրագիրն իրականացվում է 4 փուլով: Հանդիսավոր բացումը, որով ազդարարվել է «Հեքիաթին հյուր»-2011 նախագծի մեկնարկը, տեղի է ունեցել մարզկենտրոն Իջևանում՝ նոյեմբերի 4-ին: 
Նոյեմբերի 4-12-ը «Խալդ» բարեգործական ՀԿ-ն առաջին փուլում նախատեսված 16 համայնքների փոխարեն ներկայացումը ցուցադրել է Տավուշի մարզի 21 համայնքներում (Այգեձոր, Այգեպար, Արծվաբերդ, Չորաթան, Նորաշեն, Մովսես, Թովուզ, Չինչին, Նավուր, Իծաքար, Ծաղկավան, Վարագավան, Պառավաքար, Ներքին Կարմիր, Վերին Կարմիր, Չինարի, Աչաջուր, Այգեհովիտ, Ազատամոտ, Հաղարծին): Այն դիտել է վերը նշված համայնքների շուրջ 4500 մանուկ հանդիսատես, որից մոտ 800-ը` անվճար։ Ներկայացումների դիտմանը ներգրավվել են սոցիալապես անապահով խավերի բազմաթիվ երեխաներ: