Գրքեր՝ նվիրված Անդրանիկ Մարգարյանին ու Ֆրիտյոֆ Նանսենին

Երևանի քաղաքապետ Տարոն Մարգարյանը երեկ ներկա է գտնվել «Ֆրիտյոֆ Նանսեն» հիմնադրամի նախագահ, գրող Ֆելիքս Բախչինյանի երեք անուն նոր գրքերի շնորհանդեսին: «Տիեզերաչափ հույսի ու հավատի ասպետը» վերնագրով մենագրությունների աշխատությունը 6 ենթավերնագրերով ներկայացնում է երջանկահիշատակ վարչապետ Անդրանիկ Մարգարյանի կյանքի ու հասարակական-քաղաքական գործունեության հանրությանն անհայտ մնացած անկյուններ: Գրքում տեղ են գտել հատվածներ Անդրանիկ Մարգարյանի խոհերից և ապագայի մտահոգություններից:

Ֆելիքս Բախչինյանը մեծ ձեռքբերում է համարում իր կյանքում Անդրանիկ Մարգարյանի հետ հանդիպումները: Հեղինակը համոզված է, որ այս աշխատությունը առաջին քայլն է նաև հետագա մենագրությունների համար։

«Ավանգարդ» թերթի և «Տիեզերաչափ հույսի ու հավատի ասպետը» գրքի խմբագիր ու «Սիրելիները երբեք չեն հեռանում» առաջաբանի հեղինակ Ջուլիետ Մարտիրոսյանն ընդգծել է, որ լուսահոգի վարչապետն այն քաղաքական գործիչն էր, ով իր ամբողջ հոգով նվիրվում էր յուրաքանչյուրին և վարակում դրանով բոլորին, այդ թվում նաև որդուն` քաղաքապետ Տարոն Մարգարյանին: 

Երկու անուն մյուս գրքերը նվիրված են նորվեգացի հետախույզ, գիտնական, խաղաղության նոբելյան մրցանակի դափնեկիր և հայ ժողովրդի մեծ բարեկամ Ֆրիտյոֆ Նանսենին և Հայոց հարյուրերեսունմեկերորդ հայրապետ Գարեգին Առաջինի հիշատակին: Տարոն Մարգարյանը շնորհակալություն է հայտնել հեղինակին` հաճելի անակնկալի և մեծածավալ ու երկարատև աշխատանքի համար: