Կաննի փառատոնին Փարաջանովի մասին ֆիլմ կներկայացվի

Ukrinform.ua կայքի հաղորդմամբ՝ Ուկրաինայում պատրաստվում են նկարահանել Փարաջանովի մասին պատմող ֆիլմ, որը կներկայացվի Կաննի միջազգային կինոփառատոնին։

Երկու միլիոն եվրո բյուջեով ֆիլմում Փարաջանովի կերպարը մարմնավորելու համար ընտրվել է ֆրանսահայ դերասան Սերժ Ավետիքյանը, ով ծանոթ է եղել կինոռեժիսորի հետ։ Ֆիլմի ռեժիսորը Ելենա Ֆետիսովան է։

Ֆիլմը նկարահանվելու է Դրոգոբիչի բանտում և պատմելու է Փարաջանովի՝ բանտում անցկացրած տարիների մասին։ Դրոգոբիչի բանտը, ըստ ֆիլմի ռեժիսորի, շատ նման է այն բանտին, ուր բանտարկված է եղել հայ անվանի կինոռեժիսորը։

Հիշեցնենք, որ Փարաջանովը խորհրդային բանտում անցկացրել է 4 տարի։ Նա դատապարտված է եղել 5 տարվա ազատազրկման, սակայն միջազգային հանրության ճնշման տակ դուրս է եկել բանտից բանտարկության ժամկետի լրանալուց մեկ տարի առաջ։