Թող հիմա ապացուցեն, որ ուզում են փոխել իրավիճակը. Լիլիթ Պիպոյան

Բոլոր հարցերը լուծելիս առկա է սամասուդը: Մարդիկ իրենց հարցերը լուծում են իրենց միջոցներով՝ չդիմելով իրավապահ մարմիններին: Այսօր լրագրողների հետ հանդիպմանը խոսելով «Հարսնաքարի» միջադեպի մասին՝ նման կարծիք հայտնեց երգահան Լիլիթ Պիպոյանը:

«Սամասուդ է տեղի ունեցել: Այդ տեղում գործում են իրենց ներքին օրենքերը: Դա է պատճառը, որ ոչ թե հրավիրում են պատշաճ վարքի, դիմում իրավական մարմիններին, այլ տեղում սամադուդ են անում: Ինչո՞ւ է տեղի ունենում սամասուդ: Ինչո՞ւ հարգանք չկա օրենքի նկատմամբ, ինչո՞ւ օրենքը չի գործում»,- հարցնում է Պիպոյանը:

Նա հիշեցնում է իշխող կուսակցության կարգախոսը՝ «Հավատանք, որ փոխենք»: «Թող հիմա ապացուցեն, որ ուզում են փոխել իրավիճակը»,- ասում է երգահանը՝ հավելելով, որ մեղավորներին պատժելն իշխանությունների պարտքն է. ոչ թե մի քանի ամիս ձգձգել դատավարությունը, այլ արագ որոշում կայացնել: Պիպոյանի կարծիքով՝ յուրաքանչյուրը պետք է վերաբերմունք արտահայտի այս երևույթի նկատմամբ:

«Պրոդուկտները բոյկոտելով, «Հարսնաքար» չգնալով թե ինչպես՝ բայց վերաբերմունք պետք է արտահայտել: Մարդիկ պետք է հասկանան, որ մի օր էլ իրենք կարող են դրան ենթարկվել, գոնե սեփական անվտանգությունից ելնելով՝ հասկանան, որ իրենք նունպես կարող են ենթարկվել բռնության»,- ասաց երգահանը:

Անդրադառնալով այն փաստին, որ Վահե Ավետյանի հիշատակին նվիրված մոմառավության ընթացքում ռեստորանում հարսանիք էր, Պիպոյանն ասաց, որ դա զզվելի, նողկալի է ու չի կարելի նման բան անել: