«168 ժամ». «Տիգրան Սարգսյանը ՀՀ նախագահի թեկնածո՞ւ»

Ըստ ՀՀԿ-ին մոտ կանգնած «168 ժամ»-ի աղբյուրների՝ իշխանական վերնախավում դեռևս խմորումներ են ընթանում։

«Խոսքը վերաբերում է վարչապետ Տիգրան Սարգսյանին, ավելի կոնկրետ՝ նրա նկատմամբ ՀՀ նախագահ Սերժ Սարգսյանի վերաբերմունքի փոփոխությանը: Մասնավորապես, մեր տեղեկություններով՝ իշխանական վերնախավում այս օրերին քննարկվում է Տ. Սարգսյանի՝ չափից դուրս քաղաքական ակտիվությունը և նրա կողմից ձեռնարկվող բացահայտ ու թաքնված քայլերը, որոնք, նույն աղբյուրների համաձայն, մեղմ ասած, սկսել են դուր չգալ Ս. Սարգսյանին: Տ. Սարգսյանը վերջին շրջանում, բացի ՀՀԿ-ականներին անդամատոմսեր հանձնելուց և ներկուսակցական ֆունկցիոների դերի ստանձնումից, սկսել է նաև ակնհայտ անձնական հավակնություններ դրսևորել: 

Մեր տեղեկություններով` նախագահականում պարզել են, որ մամուլում վերջերս պարբերաբար հայտնվող վարկածները, ըստ որոնց՝ Տ. Սարգսյանը կարող է համարվել ՀՀ նախագահի հաջորդ թեկնածու, շրջանառության մեջ են դրվում ոչ առանց վարչապետի իմացության, երբեմն՝ նաև նրա մասնակցությամբ: Ըստ իշխանական կուլիսներում շրջանառվող խոսակցությունների՝ Ս. Սարգսյանին զայրացրել է հատկապես այն, որ Տ. Սարգսյանը չափից շատ լուրջ է վերաբերվել իրեն վերապահված դերին (այն է՝ խելացի վարչապետի ցուցադրական կերպարը), և նրա մտքով նույնիսկ անցել է մտածել ավելի մեծ խաղերի մասին: Դրան հատկապես նպաստել են ՍԺՄ-ի ու նրանից պոկված բեկորների վերամիավորման, ինչպես նաև այլ՝ մանր տրամաչափերի կուսակցությունների հետ «խաղեր սկսելու» մասին տեղեկությունները, որոնք ևս կապվում են Տ. Սարգսյանի անվան հետ: 

Բացի այդ, մեր տեղեկություններով՝ Ս. Սարգսյանին սկսել է նյարդայնացնել նաև Տ. Սարգսյանի կողմից հրապարակայնորեն դրսևորվող «կեղծ աստվածավախությունը» և նմաններին իր շուրջը հավաքելու նրա գործելաոճը: Եվ հենց այս հանգամանքներով են ոմանք բացատրում վերջին օրերին Հարություն Առաքելյանի կողմից Տ. Սարգսյանի հասցեին հնչեցված լրջագույն մեղադրանքները: Դրանք, իհարկե, ամենայն հավանականությամբ, Տ. Սարգսյանի համար անցանկալի հետևանքներ չեն ունենա (կամ չեն ունենա առայժմ), սակայն այդպիսով Ս. Սարգսյանը ցանկանում է հասկացնել, որ ինչպես «նրան ծնել են, այնպես էլ կարող են զոհաբերել»»: