Ծրագրի ամփոփում և կայքի շնորհանդես

Կայացել է «Բուհ-աշխատաշուկա արդի կամուրջների հաստատում եւ փոխգործակցության ընդլայնում» ծրագրի ամփոփումը եւ www.career.ysu.am կայքի շնորհանդեսը: ՀՀ սպորտի եւ երիտասարդության հարցերի նախարարության ու ԵՊՀ շրջանավարտների եւ կարիերայի կենտրոնի համատեղ կազմակերպած ծրագիրը մեկնարկել է դեռեւս մայիսին: Դրա հիմնական նպատակն էր պարզել համալսարան-ձեռնարկություն համագործակցության արդի հիմնախնդիրները եւ ուրվագծել համագործակցության հեռանկարները: Ավելի քան 100 ուսանող ցանոթացավ գործատուին ճիշտ ներկայանալու և նրա հետ հաղորդակցվելու խնդիրների հետ, իսկ հունիս ամսին շուրջ 40 ուսանող Ծաղկաձորում մասնակցեց թիմային աշխատանքի, լիդերության, միջանձնային հաղորդակցության լեզվի եւ մանիպուլյացիայի թեմաներով եռօրյա սեմինար-դասընթացներին: «Վաղուց էր եկել ժամանակը, որ բազում քննարկումներից անցնենք գործնական պայմանավորվածությունների եւ կոնկրետ քայլերի՝ ակտիվացնելով բուհ-ձեռնարկություններ կապը: Այսուհետ մեզ հետ պայմանավորվածություն ձեռք բերած ձեռնարկության ներկայացուցիչները կմասնակցեն ուսումնական ծրագրերի կազմման քննարկումներին ու աշխատանքներին»,- ծրագրի ամփոփիչ հանդիպման ժամանակ նշել է ԵՊՀ ռեկտորը: ՀՀ սպորտի եւ երիտասարդության հարցերի նախարարության երիտասարդական քաղաքականության վարչության պետ Արմեն Պապյանն էլ նշել է, որ նախարարությունը պատրաստ է համագործակցելու եւ աջակցելու ոչ միայն Մայր բուհին, այլեւ բոլոր բարձրագույն ուսումնական հաստատություններին: «Երիտասարդների զբաղվածության հարցն այսօր նախարարության գերակա խնդիրներից մեկն է: Մենք կարեւորում ենք բուհի եւ աշխատաշուկայի սերտ կապն ու պատրաստ ենք մեր ուժերի ներածի չափով օգնել այդ կապի ստեղծմանն ու ամրապնդմանը»,-նշել է Արմեն Պապյանը: Հանդիպման ընթացքում կայացել է նաև www.career.ysu.am կայքի շնորհանդեսը: Այն հարմարավետ գործիք է թե՛ ուսանողների, թե՛ գործատուների հետ աշխատանքը արդյունավետ կազմակերպելու եւ համապատասխան տեղեկատվությունը տարածելու համար: