Պատվիրակությունն այցելեց Արցախ

Հունիսի 23-ից 26-ը Արցախի զորամասերը հյուրընկալել էին Երեւանից մեկնած երիտասարդական պատվիրակությանը: ՀՀ սպորտի եւ երիտասարդության հարցերի նախարարության պատվերով «Երիտասարդական միջոցառումների իրականացման կենտրոնը» Արցախում իրականացրեց նախարարության ամենամյա ծրագրերից մեկը: Դրա հիմնական նպատակն է բանակ-հասարակություն կապի ու զինվորների ռազմահայրենասիրական ոգու ամրապնդումը, Արցախի երիտասարդական հասարակական կազմակերպությունների ակտիվ անդամների հետ հանդիպման կազմակերպումը: Պատվիրակության կազմում ներառված էին երիտասարդ երգիչ-կատարողներ, պարային համույթի ներկայացուցիչներ, երգիծական ժանրի կատարողներ, «Երիտասարդական միջոցառումների իրականացման կենտրոնի» աշխատակիցներ, երիտասարդական ՀԿ-ների ներկայացուցիչներ: Պատվիրակությունը գլխավորում էր նախարարության Երիտասարդական քաղաքականության վարչության պետ Արմեն Պապյանը: Երկու օրերի ընթացքում պատվիրակության անդամները Արցախի երիտասարդական ՀԿ-ների անդամների եւ ԼՂՀ մշակույթի եւ երիտասարդության հարցերի նախարարության Երիտասարդական քաղաքականության բաժնի պետ Դավիթ Ղուկասյանի ուղեկցությամբ շրջեցին Արցախի զորամասերում, ծանոթացան առօրյային: Այնուհետեւ կազմակերպվել է «Բրեյն-ռինգ» խաղ, որի մասնակիցները հենց զորամասերի` տեղում ձեւավորված 4 թիմերն էին: Խաղն անցել է շատ հետաքրքիր պայքարում` մեծ աշխուժություն առաջացնելով հանդիսատեսների եւ մասնակիցների շրջանում: Լավագույն երեք թիմերը պարգեւատրվել են մրցանակներով: Մրցույթին հաջորդած համերգային մասը ուղեկցվել է զինծառայողների բուռն ծափահարություններով: Ծրագրի մեկնարկին նախաձեռնության հեղինակները վստահեցրել են, որ նման միջոցառումների շարքը շարունակական է լինելու: