Աբդուլա Գյուլ. «Հայ-թուրքական հարաբերությունների կարգավորումը դեռ ուժը չի կորցրել»

«Հայաստանի և Թուրքիայի միջև չկարգավորված խնդիրները մեկ քայլով չեն կարող լուծվել», - այս մասին հայտարարել է Թուրքիայի նախագահ Աբդուլա Գյուլը Լոնդոնում՝ պատասխանելով լրագրողների հարցին։ Հաղորդում է "Regnum" լրատվական գործակալությունը՝ հղում անելով tumgazeteler.com լրատվական կայքին։ Ըստ Թուրքիայի նախագահի՝ հարաբերությունների կարգավորման գործընթացը սառեցված է այնքան ժամանակ, քանի դեռ չեն լուծվել մի շարք առաջնային հարցեր։

«Մի ժամանակ եղել են նախադրյալներ, և երկու երկրները ստորագրել են արձանագրությունը, սակայն ոչ  բոլորն են համաձայն եղել այդ հարցում։ Այս գործընթացում տարածաշրջանի բոլոր երկրներն իրենց շահերն են հետապնդում, ինչի պատճառով էլ որոշ դժվարություններ են առաջացել, սակայն մենք չենք կարող ասել, որ ամեն ինչ վերջնականապես կորած է», - ասել է Գյուլը։ Հաղորդում է "REGNUM" լրատվական գործակալությունը։ 

Հիշեցնենք, որ այս շաբաթ Բաքու ժամանած Թուրքիայի պառլամենտի Արտաքին հարաբերությունների մշտական հանձնաժողովի նախագահ Վոլքան Բոզքիրը հայտարարել էր, որ Ցյուրիխում Հայաստանի և Թուրքիայի միջև ստորագրված հայ–թուրքական արձանագրությունները Թուրքիայի խորհրդարանը չի վավերացնի։

Թուրքական էլիտայի ներկայացուցիչների նման հակասական հայտարարությունները ևս մեկ անգամ ապացուցում են, որ պաշտոնական Անկարան դեռ ի վիճակի չէ առանց նախապայմանների նստել բանակցային սեղանի շուրջ, ինչպես հայտարարել էր Գյուլը. «Միաժամանակ եղել են նախադրյալներ, և երկու երկրները ստորագրել են արձանագրությունները, սակայն ոչ բոլորն են համաձայն եղել այդ հարցում»։ Այս խոսքերը վկայում են այն մասին, որ հենց Թուրքիայի քաղաքական շրջանականերում են եղել վերոնշյալ անհամաձայնությունները։