Ընդունել է ՀՀ մշակույթի նախարար Հասմիկ Պողոսյանը

Այսօր ՀՀ մշակույթի նախարար Հասմիկ Պողոսյանն ընդունել է ՀՀ-ում Ալբանիայի նորանշանակ արտակարգ և լիազոր դեսպան Դաշնոր Դերվիշիին: Շնորհավորելով հյուրին պաշտոնը ստանձնելու առթիվ, նախարարը հույս է հայտնել, որ հայ-ալբանական մշակութային կապերն, այսուհետ, կդառնան առավել գործուն՝ ամուր երաշխիք հանդիսանալով հետագա փոխհամագործակցության համար:

Նախարարը դեսպանին տեղեկացրել է, որ այս տարի հայաստանյան գրական, մշակութային դաշտը միջոցառումներով հագեցած է, քանզի Հայաստանը նշում է հայ առաջին տպագիր գրքի 500-ամյա հոբելյանն ու ՅՈՒՆԵՍԿՕ-ի կողմից Երևանը գրքի 2012 թվականի համաշխարհային մայրաքաղաքի հռչակումը: Այս առիթով նախարար Հ. Պողոսյանը դեսպանին հրավիրել է ներկա գտնվելու առաջիկա գրական ծրագրերից մեկին:
Դեսպան Դաշնոր Դերվիշին շնորհակալություն է հայտնել նախարարին ջերմ ընդունելության համար, իր կողմից ևս անդրադառնալով հայ-ալբանական երկկողմ մշակութային հարաբերությունների զարգացումներին: Այս համատեքստում, դեսպանն առաջարկել է երկու երկրների մշակութային համագործակցությունն ակտիվացնելու նպատակով ստորագրել միջգերատեսչական համաձայնագիր:

Նախարար Հ. Պողոսյանը դրական է արձագանքել և հավելել է, որ 2013 թ. լրանում է հայ-ալբանական դիվանագիտական հարաբերությունների 20 ամյակը և այդ կապակցությամբ առաջարկել է իրականացնել համատեղ մշակութային միջոցառում՝ նախապես հստակեցնելով ձեռնարկի ձևաչափը: