«Հրապարակ». Վահան Հովհաննիսյանը նախագահի թեկնածու չի լինելու

Հուլիսի 5-ին տեղի կունենա ՀՅԴ Գերագույն ժողովը. այս օրերին ընթանում էին կոմիտեությունների ներկայացուցչական ժողովները մարզային կառույցներում: Որպես օրինաչափություն՝ ՀՅԴ ժողովները միշտ էլ աչքի են ընկել ոչ միայն իրենց փակ, այլև անչափ հետաքրքիր օրակարգով: Սակայն հուլիսի 5-ի Գերագույն ժողովը կարող է առանցքային դառնալ ՀՅԴ-ի համար, որովհետև ներքին խնդիրների կողքին՝ Ղարաբաղ, Ջավախք, խորհրդարանական ընտրությունների ամփոփում, կա սպասվող նախագահական ընտրություններին ՀՅԴ մասնակցության հարցը, որից էլ ածանցվելու են բոլոր մնացած խնդիրները:

Այն է՝ Հրանտ Մարգարյանի և Վահան Հովհաննիսյան-Արմեն Ռուստամյան թևերի միջև առկա հարաբերությունների վիճարկելի հարցերը, այդով պայմանավորված՝ նաև ղարաբաղյան ընտրություններին Վիտալի Բալասանյանի շուրջ ստեղծված իրավիճակը: Ինչպես նաև՝ փոխվո՞ւմ է ՀՅԴ ղեկավար կազմը, թե՞ ոչ:

Գաղտնիք չէ, որ ՀՅԴ հայաստանյան կառույցը՝ ԳՄ-ն, դժգոհ է Բյուրոյից, և այդ տարաձայնություններն իրենց արտացոլումն են ունենալու ԳԺ-ի աշխատանքներում: Ինչ վերաբերում է նախագահական ընտրություններում ՀՅԴ «վարքագծին», ապա ՀՅԴ-ից թերթին տեղեկացրել են, որ Վահան Հովհաննիսյանն այս անգամ հաստատ նախագահի թեկնածու չի լինելու:

Կարծիքները կիսվում են՝ հրանտմարգարյանական թևը հակված է այն կարծիքին, որ ՀՅԴ-ն պետք է սեփական թեկնածուով հանդես գա, Արմեն Ռուստամյանին հարող թևը հակված է առավել արմատական լուծումների, ինչպես դաշնակցականներն են ասում՝ հակված է դեպ Ռոբերտ Քոչարյան: Չի բացառվում՝ ՀՅԴ-ն որոշի, որ թեկնածու չի առաջադրելու: Իսկ թե այդ դեպքում ում կպաշտպանի, կկայացվի իրավիճակային որոշում:

ԳԺ-ն, ինչպես միշտ, կանցկացվի Ծաղկաձորում: