Պաղեստինի իշխանությունը թուլատրել է արտաշիրմել Յասիր Արաֆաթի աճյունը

Պաղեստինի ինքնավարության ղեկավար Մահմուդ Աբասի հրամանով թույլատրվել է իրականացնել Պաղեստինի նախկին առաջնորդ Յասիր Արաֆաթի աճյունի արտաշիրիմումը մահվան պատճառներն ավելի մանրակրկիտ ուսումնասիրելու նպատակով։ Նման պահանջով Al Jazeera–ին տված հարցազրույցում հանդես էր եկել նաև Արաֆաթի կինը՝ Սուհա Արաֆաթը։

Ավելի վաղ, Al Jazeera հեռուստաալիքը հաղորդել էր, որ մի քանի ամիս լրագրողական հետաքննություն է անցկացրել, որի արդյունքները ցույց են տալիս, որ Արաֆաթի մահվան պատճառը ռադիոակտիվ նյութերն են, մասնավորապես՝ պոլոնիումի ներթափանցումը օրգանիզմ։

Al Jazeera–ի նախաձեռնությամբ, Լոզանի ռադիոֆիզիկայի ինստիտուտը հետազոտել է Արաֆաթի՝ կենդանության օրոք օգտագործած անձնական իրերը, որոնցում հայտնաբերվել է պոլոնիում-210–ի տարրեր։ Հետազոտողների կարծիքով, ռադիոակտիվ նյութի առկայությունն էլ հանգեցրել է 75-ամյա քաղաքական գործչի առողջական վիճակի կտրուկ վատթարացմանը։

Այդ վարկածը պաշտոնապես հաստատելու համար շվեյցարացի գիտնականներին անհրաժեշտ է հետազոտության ենթարկել Արաֆաթի աճյունը։ Եթե այդ հետազոտության արդյունքում հայտնաբերվեն պոլոնիումի տարրեր, ապա կարելի է ասել, որ Արաֆաթը միանշանակ մահացել է թունավորումից։

Արաֆաթը երկար տարիներ պայքարել է պաղեստինցիների անկախության համար։ Նա Պաղեստինի ինքնավարության առաջին ղեկավարն է եղել և առաջնորդել է  Fatah դիմադրական շարժումը և Պաղեստինի ազատագրական կազմակերպությունը։

Արաֆաթը մահացել է 2004–ի հունվարին Փարիզի զինվորական հոսպիտալում։ Այդ ժամանակ նույնպես առաջ էր քաշվում նրան թունավորելու վարկածը, թեև ասվում է, որ բժիշկները նրա օրգանիզմում թունավոր նյութեր չէին հայտնաբերել։