ԵՄ-ն կոչ է անում վերացնել ընտրական համակարգի թերությունները. Ռոմպեյ

Եվրամիությունը ողջունում է Հայաստանի իշխանությունների ջանքերը՝ ուղղված առավել թափանցիկ և մրցակցային խորհրդարանական ընտրությունների անցկացմանը՝ փաստելով, սակայն, որ միջազգային դիտորդները մի շարք թերություններ են հայտնաբերել, որոնք հարկ է վերացնել մինչև 2013թ. նախագահական ընտրությունները, չորեքշաբթի Երևանում հայտարարեց Եվրամիության նախագահ Հերման Վան Ռոմպեյը:

«ԵՄ-ն ողջունում է հայկական իշխանությունների ջանքերը՝ արդար և թափանցիկ խորհրդարանական ընտրություններ անցկացնելու ուղղությամբ: Դա կարևոր քայլ էր առաջ: Այդուհանդերձ, դեռևս մի շարք խնդիրներ կան, որոնք նշված էին ԵԱՀԿ/ԺՀՄԻԳ առաքելության դիտորդների վերջնական զեկույցում: Հուսով ենք, որ այդ խնդիրները կլուծվեն մինչև հաջորդ տարվա նախագահական ընտրությունները»,- ասաց նա՝ ելույթ ունենալով «Հայաստանը Եվրոպայում» համաժողովի ժամանակ:

Եվրոպացի դիտորդների գնահատականի համաձայն՝ ընդհանուր առմամբ խորհրդարանական ընտրությունները Հայաստանում կազմակերպվել և անցկացվել են պրոֆեսիոնալ կերպով և արդյունավետ: Սակայն նրանք նաև հայտարարել էին, որ ընտրությունների օրը նկատել են հայկական օրենսդրության և միջազգային պարտավորությունների խախտումներ:

Այդ համատեքստում Ռոմպեյը նշեց, որ Եվրամիությունը պատրաստ է Հայաստանին օժանդակություն ցուցաբերել, և որքան շատ հայկական իշխանությունները ժողովրդավարական բարեփոխումներ անցկացնելու պատրաստակամություն հայտնեն և հավատարիմ մնան եվրոպական արժեքներին, այնքան շատ օգնություն կստանա Հայաստանը:

«Մենք ողջունում ենք ԵՄ արժեքների վրա հիմնված, Եվրամիության նորմերի և չափանիշների մերձեցմանն ուղղված բարեփոխումներ անցկացնելու Հայաստանի պատրաստակամությունը: Դա Հայաստանի հստակ ռազմավարական ընտրությունն է: Ձեր երկիրը ճիշտ ճանապարհի վրա է, թեև շատ աշխատանք կա»,- նշեց նա:

ԵՄ-ն պաշտոնապես խոստացել էր, որ եթե ընտրություններն անցնեն եվրոպական չափանիշներին համապատասխան, ԵՄ-ն կկազմակերպի դոնոր երկրների համաժողով՝ Հայաստանին ֆինանսական օժանդակություն ցուցաբերելու համար:

ԵՄ ընդարձակման և հարևանության հարցերով հանձնակատար Շտեֆան Ֆյուլեի խոսնակ Փիթեր Սթանոն «Ազատություն» ռադիոկայանին օրերս հայտնել էր, որ «Եվրամիությունն առայժմ հետաձգում է խոստացված համաժողովը՝ նշելով, որ խորհրդարանական ընտրությունները լիովին չարդարացրեցին սպասումները, և այժմ Բրյուսելում սպասում են 2013թ. նախագահական ընտրություններին»:

Ըստ հրատարակության՝ խոսքը մոտ 1,5 մլրդ եվրոյի մասին է: