Ռուբեն Հայրապետյանը կարող է 15-օրյա ժամկետում ետ վերցնել իր դիմումը. ցուցարարներն անհանգստանում են

Lurer.com-ը խոսել է ԱԺ-ի դիմաց բողոքի ցույցի մասնակիցների հետ և հետաքրքրվել նրանց նախատրամադրվածության մասին։

Նվարդ Մանասյանի խոսքով, հասարակության ակտիվ ճնշումների հետևանքով Ռուբեն Հայրապետյանը վայր դրեց մանդատը՝ հասկանալով, որ բողոքի ցույցերը պետք է շարունակվեն և կարող են վտանգավոր դառնալ։

«Մեզ հանգստացնելու համար նախագահական ընտրություններին ընդառաջ կատարվեց քայլ առաջ, սակայն մենք շարունակելու ենք պահանջել ամբողջական լուծում տալ՝ քրեական պատասխանատվություն կանչելով Նեմեց Ռուբոյին։ Վերջինս որպես կերպար վտանգավոր է մեր պետության համար, բանը հասավ նրան, որ կատարվեց ոտնձգություն բանակի նկատմամբ։ Փաստորեն ոչ ոք պաշտպանված չէ՝ այդ թվում այնպիսի պաշտոնական կառույցը, որը կոչված է պաշտպանելու հասարակությունը։ Իսկ այս դեպքը միակը չէ, որքան-որքան նման դեպքեր են մնացել անպատիժ։ Այդ պատճառով մենք սկսել են գծել ինքնադատաստանի քարտեզ»,- նշել է Նվարդ Մանասյանը, որն ի դեպ հինգերորդ գումարման ԱԺ-ի ՀՅԴ մեծամասնական ընտրացուցակով առաջադրված պատգամավորության թեկնածու էր։ 

Ցույցի ներկաները մտավախություն ունեին, որ Ռուբեն Հայրապետյանի հրաժարականը միայն միտում ունի մեղմելու հասարակության բողոքը։ Հիշատակելով Գագիկ Բեգլարյանին հայտնի պատճառներով քաղապետի պաշտոնից պաշտանկ անելը, իսկ ամիսներ անց նրան նախարարական պորտֆել շնորհելը՝ ցուրարները մտահոգված էին, որ սցենարը կարող է կրկնվել. կամ Ռուբեն Հայրապետյանը ետ կվերցնի դիմումը, կամ էլ ամիսներ անց նրան ավելի «յուղալի» պաշտոն կտան։

«Չէ՞որ Ռուբեն Հայրապետյանը կարող է 15 օրյա ժամկետում ետ վերցնել իր դիմումը, իսկ մինչև որոշման ուժի մեջ մտնելը, ամեն ինչ կարող է պատահել»,- ասել է զայրացած տիկին Ալվարդը։

Հաղորդավար և դերասան Ալեն Սիմոնյանն էլ բնական է համարում պատգամավորի մանդատի վայր դնումը։

«Այնքան չենք տեսել այսպիսի քայլ, որ շատերը այն գերագնահատում են ու համարում արտառոց լավ բան։ Իրականում հայտնի չէ, թե ինչ արմատներ են թաքնված սրա տակ։ Ես հանդիպել եմ հոդվածների, որոնցում գրված էր, թե Ռուբեն Հայրապետյանը անտրամադիր է։ Իսկ ժողովուրդը որքա՞ն ժամանակ է անտրամադիր. մարդ է մահացել, իսկ ինքը  անտրամադի՞ր է, ջհանդամը՝ անտրամադիր չլինի»,- եզրափակել է Ալենը։