Մունդուրուկու ցեղի հնդկացիները կանգնած են պատերազմի շեմին

Բրազիլիայի հյուսիսում ապրող Մունդուրուկու ցեղի հնդկացիները կանգնած են պատերազմի շեմին։

Ինչպես հաղորդել են Պարա նահանգի հասարակության անվտանգության վարչությունից, նետերով զինված մոտ 60 հնդկացիներ գիշերը հարձակվել են ռազմական ոստիկանության վրա: Մունդուրուկուի ռազմիկները վառել են ոստիկանատան շենքը, զինապահեստից հափշտակել երկու հրաձիգ և 38 տրամաչափի ատրճանակ: Ոստիկաններից մեկի ձեռքը վիրավորվել է նետից, սակայն բարեբախտաբար՝ նետի ծայրը թունավորված չի եղել և նրա կյանքին վտանգ չի սպառնում:

Իշխանությունները ենթադրում են, որ հնդկացիները դիմել են ռազմական գործողությունների այն բանից հետո, երբ տեղի դատախազությունը վճռել է ազատ արձակել սպանության մեջ մեղադրվող իրենց 4 ցեղակիցներից 2-ին:

Ժակարեականգա քաղաքի կոմիսարիատի վրա հարձակման դեպքից հետո Բրազիլիայի իշխանությունները շտապ այնտեղ են ուղարկել զինված ոստիկանական ստորաբաժանում, որի մարտիկներ տիրապետում են տակտիկական գործողությունների և արևադարձային ջունգլիներում գոյատևելու նրբությունների:

Ինչպես նշում են բրազիլիայի մարդաբանները և ազգագրագետները, Ամազոնի հնդիկ ցեղերի վերաբերմունքը «սպիտակ մարդու աշխարհ»-ի նկատմամբ վերջին շրջանում փոխվել է: Այժմ տեղաբնիկներն իրենց անվտանգության և իրավունքների խախտման մեջ մեղադրում են տեղի իշխանություններին, իսկ առաջ նրանց համար ուղղակի խորթ և տարօրինակ էին «իշխանություն», «ոստիկանություն», «դատարան» հասկացությունները: