ՀՀ փոխվարչապետն ընդունեց ԻԻՀ նորանշանակ դեսպանին

ՀՀ փոխվարչապետ, տարածքային կառավարման նախարար Արմեն Գեւորգյանն այսօր ընդունեց Հայաստանի Հանրապետությունում Իրանի Իսլամական Հանրապետության նորանշանակ արտակարգ եւ լիազոր դեսպան Մուհամմադ Ռեիսիին:

Փոխվարչապետը շնորհավորեց նորանշանակ դեսպանին՝ դիվանագիտական առաքելությունն ստանձնելու կապակցությամբ եւ հաջողություն մաղթեց պատասխանատու աշխատանքում: Նա նշեց, որ վերջին
տարիներին հայ-իրանական հարաբերությունները տարբեր ոլորտներում դինամիկ կերպով զարգանում են, եւ օրակարգում բավական հետաքրքիր ու հավակնոտ ծրագրեր կան, որոնց հաջող իրագործումը կարեւոր նշանակություն ունի երկու երկրների համար:

Անդրադառնալով միջմարզային համագործակցությանը՝ փոխվարչապետը նկատեց, որ Հայաստանի որոշ մարզեր եւ Իրանի նահանգներ հաջողությամբ գործակցում են, բայց այդ հարաբերությունները զարգանալու եւ ընդլայնվելու մեծ ներուժ ունեն: "Այդ մակարդակում շփումները բավականին գործնական են, պայմանավորվածություններ են լինում կոնկրետ ծրագրերի շուրջ, որոնք ապահովում են կոնկրետ արդյունքներ, եւ դա նպաստում է նաեւ երկկողմ ապրանքաշրջանառության աճին",-նշեց Ա. Գեւորգյանը:

Դեսպանն իր հերթին վստահեցրեց, որ իր գործունեությամբ հնարավորինս կնպաստի Հայաստանի եւ Իրանի միջեւ կապերի սերտացմանը: Համաձայնելով, որ միջմարզային փոխգործակցությունը լավ հեռանկար եւ մեծ ներուժ ունի՝ նա տեղեկացրեց, որ ներկայումս ուսումնասիրում է, թե Իրանի նահանգներից որը ինչ ընդհանրություն ունի Հայաստանի մարզերի հետ՝ համագործակցության շրջանակն ընդլայնելու նպատակով:

Զրուցակիցները քննարկեցին նաեւ ԻԻՀ ներքին գործերի նախարարի Հայաստան կատարելիք առաջիկա այցի հետ կապված հարցեր: