Մեկնարկում է «Ոսկե ծիրան» 9-րդ երևանյան միջազգային կինոփառատոնը

Գիտություն և Մշակույթ 4 Հուլիս, 2012 23:09

ՀՀ մշակույթի նախարարության աջակցությամբ իրականացվող «Ոսկե ծիրան» երևանյան միջազգային կինոփառատոնի 9-րդ մեկնարկը կտրվի ս. թ. հուլիսի 8-ին «Մոսկվա» կինոթատրոնում և կշարունակվի մինչև հուլիսի 15-ը: Ամենամյա փառատոնը Երևանում կհյուրընկալի համաշխարհային կինոարվեստի ականավոր գործիչների, կներկայացնի հայ և օտարազգի ռեժիսորների ժամանակակից և արդեն դասական դարձած գործերը: Այս տարի, «Ոսկե ծիրան» միջազգային կինոփառատոնին մասնակցում են շուրջ 230 մասնակից և հյուրեր, ավելի քան 150 ֆիլմով:

«Ոսկե ծիրան» 9-րդ միջազգային կինոփառատոնը բաղկացած է «Խաղարկային», «Վավերագրական», «Հայկական համայնապատկեր» և «Կորիզ» մրցութային ծրագրերից:

Խաղարկային ֆիլմերի միջազգային ծրագրի ժյուրին գլխավորում է աշխարհահռչակ կինոռեժիսոր, Կաննի փառատոնի մրցանակակիր Վիկտոր Էրիսեն: Ժյուրիի կազմում ընդգրկված են՝ Շառլ Տեսոն (կինոքննադատ, Ֆրանսիա),Ֆրեդ Կելեմեն (կինոքննադատ, Գերմանիա), Հանուս Կազդան (կինոքննադատ, Լեհաստան), Ռոլանդ Ղազարյանը (հնչյունային ռեժիսոր):

Վավերագրական ֆիլմերի մրցույթի ժյուրին գլխավորում է ռուս անվանի վավերագրող Մարինա Ռազբեշկինան: Ժյուրիի կազմում ընդգրկված են՝ Անտոնիո Դելգադոն (ռեժիսոր/պրոդյուսեր, Իսպանիա), Նանա Ջանելիձեն (ռեժիսոր/սցենարի հեղինակ, Վրաստան), Ցվետանա Պասկալևան (ռեժիսոր, Բուլղարիա), Նունե Սարգսյանը (ռեժիսոր/պրոդյուսեր, Հայաստան):

Հայկական համայնապատկեր ծրագրի ժյուրին գլխավորում է Լի Սանգ Յոնգը (փառատոնային ղեկավար, Հարավային Կորեա), Էմիլիա Հավիրովան (կինոքննադատ, Չեխիայի Հանրապետություն), Վալերի Բալայանը (կինոռեժիսոր, Ռուսաստան), Ադելինա ֆոն Ֆուրցենբերգը (պրոդյուսեր, Շվեյցարիա), Սիտորա Ալիևան (փառատոնի տնօերն, Ռուսաստան), Վիգեն Բերբերյանը (գրող. ԱՄՆ):

Կարճամետրաժ ֆիլմերի «Կորիզ» մրցութային ծրագրի ժյուրիի կազմում ընդգրկված են Ալյոնա Շումակովան (Իտալիա), Ալեքսեյ Մեդվեդևը (Ռուսաստան), Տորուն Նյենը (Նորվեգիա):

ՖԻՊՐԵՍԻ (Կինոքննադատների միջազգային ֆեդերացիա) ժյուրիի կազմում ընդգրկված են՝ Մարգարիտա Շապատե Լոպեզը (Իսպանիա), Ժոաո Անտունեսը (Պորտուգալիա), Գարեգին Զաքոյանը (Հայաստան):

ԷԿՈՒՄԵՆԻԿ ժյուրիի կազմում ընդգրկված են Քրիստին Գրինուեյը, Ռիկարդո Ռուիզ դե լա Սերնան, Գևորգ Սարոյանը: