«Հրապարակ». Այսօր մեկնարկող ՀՅԴ Գերագույն ժողովը կտևի երեք օր

Այսօր մեկնարկող ՀՅԴ Գերագույն ժողովը կտևի երեք օր: Ժողովը հիմնականում ունենում է քառասուն պատվիրակ ու նույնքան էլ հրավիրյալ: Հրավիրյալ ՀՅԴ անդամները քվեարկելու իրավունք չունեն:

ԳՄ ընտրությունները բավականին հետաքրքիր կարգով են ընթանում. երբ որևէ մեկի թեկնածությունն առաջադրվում է, պատվիրակներից ինչ-որ մեկը պետք է այն երկրորդի, այլապես թեկնածությունն անվավեր կհամարվի: ԳՄ-ում անչափ կարևոր է նաև ստացած ձայների քանակը. ԳՄ անդամ է ընտրվում ոչ թե կեսից ավելի ձայներ ստացած պատվիրակը, այլ առաջին քվեարկության ժամանակ երկու երրորդով անցած թեկնածուն:

Ստացած ձայների քանակն էլ ավելի կարևոր է ԳՄ ներկայացուցիչ ընտրելու հարցում. ձայները վերջինիս համար հզոր քարտ բլանշ են բոլոր կարգի հարցեր լուծելիս:

Այս անգամ, ավելի քան երբևէ, ԳՄ ընտրությունները կընթանան անչափ թեժ մթնոլորտում: Բանն այն է, որ խորհրդարանական ընտրություններից հետո արդեն իսկ ՀՅԴ-ում անհամաձայնություններն իրենց պիկին էին հասել ՀՅԴ ֆրակցիայի կազմի և ղեկավարի հարցում: Նախ մանդատից հրաժարվեց Արտյուշա Շահբազյանը, և «Գրանդ քենդիի» ներկայացուցիչը պատգամավոր դարձավ, ինչն էլ առաջացրեց շատերի դժգոհությունը: Ինչ վերաբերում է ֆրակցիայի դեկավարի խնդրին, ապա ՀՅԴ երկու թևերը մի կերպ հանգեցին կոնսենսուսի. Հրանտ Մարգարյանի թևն առաջադրել էր Աղվան Վարդանյանին, իսկ հակընդդեմ թևը չկարողացավ անցկացնել Վահան Հովհաննիսյանին, կոմպրոմիսի արդյունքում ֆրակցիայի ղեկավար դարձավ Արմեն Ռուստամյանը: