«Ժողովուրդ». Ինչպե՞ս է Սերժ Սարգսյանը կազմել ՀՀԿ ցուցակները

Ըստ «Ժողովուրդ»-ի տեղեկությունների` Սերժ Սարգսյանը ՀՀԿ համամասնական ու մեծամասնական ցուցակները կազմելիս խորհրդակցություն է անցկացրել իր մերձավոր շրջապատի հետ. դրան մասնակցել են Հովիկ Աբրահամյանը, Բարսեղ Բեգլարյանը` Ֆլեշը, Վիկտոր Դալլաքյանը, փեսան` Միքայել Մինասյանը, ՍԴ նախագահ Գագիկ Հարությունյանը և այլք:

Եվ ահա որոշվել Է Աժ ՀՀԿ խմբակցությունը կազմավորել հետևյալ համամասնությամբ, այնտեղ տեղ են գտել ՀՀԿ տեսակետը ներկայացնողները, «օսլայած մազերով», արտերկրում կրթություն ստացած երիտասարդները, այլ քաղաքական ուժերի, մասնավորապես ՀԱԿ-ի ու ԲՀԿ-ի դեմ խոսողները, «կոճակները», որոնց միակ առաքելությունը լինելու է քվորում և դահլիճում ներկայություն ապահովելն ու համապատասխան կոճակը սեղմելը, ինչպես նաև` ուժայինները, որոնք հարկ եղած դեպքում պետք է հարձակվեն` բառի ամենաուղիղ իմաստով:

«Ժողովուրդ»-ի աղբյուրներն բավական ուշագրավ մանրամասներ են պատմել ՀՀԿ խմբակցության կազմի ձևավորման վերաբերյալ:

Բանն այն է, որ ՀՀԿ-ի` ԵԺԿ-ին անդամակցելու գործընթացի ժամանակ Ս. Սարգսյանը միջազգային կառույցներին խոստացել է գնալ կտրուկ փոփոխությունների, մասնավորապես՝ ՀՀԿ ցուցակ չընդգրկել քրեական-օլիգարխիկ տարրերին՝ փոխարենը ասպարեզ բացելով արտերկրում կրթություն ստացած երիտասարդների համար:

Նույնիսկ ՀՀԿ համամասնական ընտրացուցակի նախնական քննարկումների ժամանակ նա խոսել է թիմում սերնդափոխության, երիտասարդ կադրերի ներգրավման անհրաժեշտության մասին:

Բայց ամեն ինչ փոխվել է ԲՀԿ համագումարից հետո: ԲՀԿ համագումարից մեկ օր անց նա հայտարարել է, թե երիտասարդների թիմով իրենք «պրավալ կտան» ոչ միայն Աժ, այլև դրան հաջորդող նախագահական ընտրությունները:

Արդյունքում՝ որոշվել է կրկին դիմել կրիմինալ-օլիգարխների աջակցությանը՝ գետանցի ժամանակ չփոխելով ձիերը: