WikiLeaks-ը 2 միլիոն գաղտնի փաստաթուղթ է հրապարակել Սիրիայի վերաբերյալ

WikiLeaks կայքն այսօր ավելի քան 2 միլիոն գաղտնի էլեկտրոնային փաստաթուղթ է հրապարակել Սիրիայի իշխանության վերաբերյալ։

Հաղորդագրությունում նշվում է, որ հրապարակված նյութերում Սիրիայի կառավարության անդամներից ԱԳ, ֆինանսների, տեղեկատվության, տրանսպորտի և մշակույթի նախարարների մասին գաղտնի տեղեկություններ պարունակող փաստաթղթեր են հրապարակվել։ Դրանք վերաբերում են 2006–ի մարտից մինչև 2012 թվականն ընկած ժամանակահատվածին։ 

Սիրիայի իրադարձությունների վերաբերյալ հետաքրքրությունը Արևմուտքի՝ մասնավորապես ԱՄՆ–ի կողմից ավելացել է հատկապես վերջին մեկ ու կես տարում՝ կապված այդ երկրում տեղի ունեցող հակակառավարական բողոքի ցույցերի և իշխանությունների կողմից խաղաղ բնակչության նկատմամբ շարունակվող բռնությունների ֆոնին։ 

Փետրվարին Anonymous հաքերական խումբը հաղորդագրություն էր տարածել առ այն, որ Սիրիայի նախագահի աշխատակազմի մի քանի տասնյակ անդամների էլեկտրոնային հասցեներն են կոտրվել։ Հրապարակված էլեկտրոնային նամակագրությունը վերաբերում էր Սիրիայի նախագահ Բաշար Ասադի՝ ամերիկյան ABC հեռուստաալիքին հարցազրույց տալու նախապատրաստական աշխատանքներին։ 

Մարտին բրիտանական Guardian պարբերականը հրապարակել էր Բաշար Ասադի և նրա կնոջ՝ Ասմա Ասադի էլեկտրոնային նամակագրությունը, որտեղ եղել էին ինչպես ներքաղաքական իրավիճակի վերաբերյալ հարցեր, այնպես էլ կենցաղային թեմաներ։ 

Հիշեցնենք, որ ըստ ՄԱԿ–ի վերջին տվյալների, Սիրիայում ավելի քան մեկ ու կես տարի չդադարող հակակառավարական բողոքի ցույցերի ժամանակ սպանվել է ավելի քան 12 հազար մարդ։