Համաշխարհային տնտեսությունը նոր ուժ է ստանում

Հուլիսի 5-ին ԵՄ-ն, Մեծ Բրիտանիան և Չինաստանն իրենց վարած դրամավարկային քաղաքականության մեջ փոփոխություններ են կատարել:

Տեղի ունեցած նիստի ժամանակ ԵԿԲ-ն վերաֆինանսավորման տոկոսադրույքն իջեցրել է մինչև 0.75%: Օվերնայթ ավանդի տոկոսադրույքը հասցվել է զրոյական մակարդակի, ինչը նպաստելու է եվրոպական պարտքային ճգնաժամի հաղթահարմանը: ԵԿԲ-ի ղեկավար Մարիո Դրագին հայտարարել է,որ պարտքային ճգնաժամը մեծ վնասներ է հասցրել եվրոպական տնտեսությանը: Դա ստիպում է ԵԿԲ-ին ճգնաժամի դեմ պայքարելու համար կիրառել լրացուցիչ մեթոդներ:

Չինաստանի Ազգային բանկը (ՉԱԲ) նույպես իջեցրել է առանցքային տոկոսադրույքները: Վերջին երկու ամիսների ընթացքում սա դրամավարկային քաղաքականության արդեն երկրորդ մեղմացումն է: Մինչ «հունիսյան մեղմացումները», ՉԱԲ-ը 2008 թ.-ից այս կողմ այդպիսի քայլերի չէր դիմել: Ըստ Shore Capital-ի մասնագետ Ռուպերտ Արմիթաջի, Չինաստանը մեղմացնում է իր վարած դրամավարկային քաղաքականությունը, քանի որ տնտեսական աճի տեմպերն ընկնում են սպասվածից ավելի արագ:

Անգլիայի Բանկը որոշել է Մեծ Բրիտանիայի բանկեր ներգրավել լրացուցիչ 50 մլրդ. ֆունտ ստերլինգ՝ մեծացնելով քանակական մեղմացման ծրագիրը, իսկ սահմանված 0.5%-ը տոկոսադրույքը մնացել է անփոփոխ: Ըստ Անգլիայի Բանկի ներկայացուցիչների, առանց լրացուցիչ ֆինանսական միջոցների ներգրավման, ինֆլյացիայի տեմպերը շատ արագ կնվազեն, ինչը չի նպաստում տնտեսական ճգնաժամի դեմ պայքարին:

Ըստ Societe Generale-ի տնտեսագետ Ջեյմս Նիքսոնի, հուլիսի 5-ին կայացրած ամենակարևոր որոշումը օվերնայթ ավանդի տոկոսադրույքը զրոյական մակարդակի հասցնելն էր, ինչը կարող է լուրջ խթան դառնալ ֆինանսական շուկայում և հնարավորություն կտա բանկերին լուծել իրենց ֆինանսական խնդիրները: