Ֆիզիկոսները հայտնաբերել են Հիգսի բոզոնի թեկնածուի

Ֆիզիկոսները հայտնաբերել են նոր տարրական մասնիկ, որի բնութագրիչները համաձայնության մեջ են Հիգսի վարկածային բոզոնի նմանատիպ պարամետրերի հետ, սակայն դեռ չեն հայտարարում վերջինիս հայտնագործության մասին։ Իրենց՝ ֆիզիկոսների պնդմամբ, դեռ ստուգելու բազմաթիվ կետեր կան։ Նոր տարրական մասնիկի ենթադրյալ զանգվածը 125 գիգաէլեկտրոնվոլտից քիչ ավելին է։ Այս մասին հայտնում է CERN-ի կայքը։

Նոր արդյունքները զեկուցվել են CERN-ում անցկացված բաց սեմինարի ընթացքում, որին համապատասխանաբար Atlas և CMS դետեկտորներով աշխատող գիտնականների երկու խումբ ներկայացրել է իր մոտեցումները։ Դետեկտորները գրանցում են Մեծ հադրոնային կոլայդերում մասնիկային փնջերի բախման հետևանքով առաջացող տարրական մասնիկները։ Հատկանշական է, որ մամլո հաղորդագրությունը հրապարակվել է մինչև զեկույցի ավարտը։

Առաջինը ելույթ է ունեցել Ջո Ինկանդելան՝ CMS-ի խմբի ներկայացուցիչը, և պատմել, որ 3600 գործըկներները ունեցող խմբի գիտնականներն ուսումնասիրել և վերլուծել են Հիգսի բոզոնի տրոհման հինգ տարբեր սցենարների տվյալները, որոնցից երկուսը 125 գիգաէլեկտրոնվոլտ զանգվածի դեպքում հանգեցնում են հզոր վիճակագրական ազդանշանի (5 սիգմայից ավելի)։ Մյուս երեք ուղիները, սակայն, փչացնում են վիճակագրությունը և փոքր-ինչ նվազեցնում հայտնագործության հավաստիության ցուցիչը։

Ինկանդելայից հետո ելույթ է ունեցել Ֆաբիոլա Ջիանոտին՝ Atlas գործընկերության ղեկավարը։ Նա ներկայացրել է միայն երկու ուղիների արդյունքները, որի վիճակագրական կարևորությունը 5 սիգմա է։ Զանգվածի ցուցիչն այս խմբի համար քիչ այլ էր՝ 126 գիգաէլեկտրոնվոլտ։ Գիտնականն իր ելույթն ավարտել է հետևյալ խոսքերով. «126 ԳէՎ էներգիաներում մեկ կարող ենք մանրամասնորեն ուսումնասիրել նոր մասնիկը։ Շնորհակալ ենք Բնությունից»։

Այսպիսով, ֆիզիկոսները եզրակացնում են, որ հայտնաբերվել է նոր տարրական մասնիկ։ Նրանք շեշտում են, որ արդյունքները դեռևս նախնական են և նշում, որ հարկ է մանրամասնորեն ճշգրտել բոլոր պարամետրերը, քանի որ դրանք կարող են տարբերվել կանխագուշակվող Հիգսի բոզոնի բնութագրիչներից։ Որոշ տեսություններ պնդում են, որ դրանք անգամ կարող են մի քանի տարատեսակի լինել։

Հիգսի բոզոնը վարկածային մասնիկ է, Հիգսի դաշտի քվանտ, որը պատասխանատու է մնացյալ տարրական մասնիկների՝ զանգվածով օժտված լինելու համար։ Այն միկրոաշխարհի փոխազդեցությունները նկարագրող Ստանդարտ մոդելի միակ դեռևս բացակայող մասնիկն է։