Տոլմայի փառատոն Սարդարապատում

Հուլիսի 11-ին Սարդարապատ հուշահամալիրում տեղի կունենա տոլմայի հայկական 2-րդ փառատոնը, այս մասին Lurer.com-ին հայտնեց փառատոնի կազմակերպիչ և «Հայ խոհարարական ավանդույթների զարգացման և պահպանման» ՀԿ-նախագահ Սեդրակ Մամուլյանը։

Փառատոնի ընթացքում ցուցադրվելու են 18-ից 20 տաղավարներ, որոնցում ներկայացվելու են տոլմայի տարատեսակները։ Մարդիկ ազատ են տոլմայի պատրաստման եղանակի հարցում, դրանք կարող են լինել ինչպես նորույթներ, այնպես էլ մեր տատերից եկած ձևերը։

Ներկայացված տոլմաները գնահատվելու են ժյուրիի կողմից 3 անվանակարգերով՝ «լավագույն մտահղացում», «լավագույն համ», «լավագույն տեսք»։

Գլխավոր մրցանակակիրը չի մասնակցելու այս երեք անվանակարգերին, նրան ընտրելու է ՀԿ-ն, և որպես մրցանակ ստանալու է կավե գավաթ։

«Փառատոնի անցկացման վայրը պատահական չէ ընտրված, այն մեր ազգի ինքնագիտակցության մեջ ինքնապաշտպանության, պաշտպանության կենտրոն է համարվում։ Ազգային խոհանոցի միջոցով ցանկանում ենք ազգային ինքապաշտպանական բնազդը արթուն պահել»,- նշում է Սեդրակ Մամուլյանը։

Նպատակ կա, որ փառատոնն անցկացվի նաև հայկական գաղթօջախներում, բայց առաջիկա պլանների մեջ մտնում են Հայաստանի մարզերը։

Օրինակ, Ախթալայում խորովածի փառատոնը տեղի ունեցավ, օգոստոսի 11-ին Սևանի տարածաշրջանի Ծաղկունք գյուղում Նավասարդը կնշվի։

Այս կերպ «Հայ խոհարարական ավանդույթների զարգացման և պահպանման» ՀԿ-ն փորձում է իր լուման ներդնել մեր երկիրը զբոսաշրջության համար գրավիչ դարձնելու հարցում։ Փառատոնի կազմակերպչական աշխատանքներին իր մեծ ներդրումն ունի Հայաստանի մշակույթի նախարարությունը և Արմավիրի մարզպետարանը։

Ըատ Մամուլյանի, որ Տոլմա բառը առաջացել է «տոլի» բառից, որը հին հայերենով նշանակում է խաղողի վազ։ Այսպես կարող ենք հերքել այն տարածված թյուր կարծիքը, թե այդ կերակրատեսակը թուրքական արմատներ ունի: