Քաթարը կոչ է անում «Սիրիայի ընկերներին» մոռանալ ՄԱԿ-ի անվտանգության խորհուրդը

Քաթարի վարչապետ Համադ բին Ջասիմ Ալ-Թանին «Սիրիայի ընկերները» հերթական համաժողովում հավաքվածներին կոչ է արել ուշադրություն չդարձնել սիրիական ճգնաժամի հարցում ՄԱԿ-ի Անվտանգության խորհրդի անգործությանը կամ գործունեությանը, տեղեկացնում է «Ալ Ջազիրան»։

«Ի՞նչ կարող ենք ձեռնարկել ՄԱԿ-ի անվտանգության խորհրդի սահմաններից դուրս։ Այո։ Արե՞լ ենք արդյոք նախկինում նման բան։ Այո, և ունենք դրա բազմաթիվ օրինակներ»,- ասել է երկրի ղեկավարը և ընդգծել, որ իրենց երկիրը պատրաստ է մասնակցություն ունենալ յուրաքանչյուր նախաձեռնության մեջ, որը «կկարողանա դուրս բերել բնակչությանը ներկայիս ողբերգական իրավիճակից»։

Ներկայումս Ռուսաստանը և Չինաստանը արգելափակել է ՄԱԿ-ի Անվտանգության խորհրդի՝ Սիրիայում ապստամբության ուժային ճնշում դատապարտող  բանաձևի ընդունումը։ Մոսկվան և Պեկինը պնդում են, որ սիրիացիներն իրենք պետք է հաղթահարեն սեփական խնդիրները՝ երկխոսության հիման վրա։

Ինչպես հաղորդվում էր, Քաթարը ոչ պաշտոնապես զենք, զինամթերք, կապի միջոցներ և գումար է մատակարարում Բաշար Ասադի ռեժիմի դեմ պայքարող ապստամբներին։ Լիբիայի քաղաքացիական պատերազմի ժամանակ քաթարցիները նույնպես ակտիվորեն աջակցում էին Մուամար Քադաֆիի հակառակորդներին։

Կատարը, չնայած իր ոչ մեծ չափսերին, Մերձավոր Արևելքում իրականացնում է բացառիկ ակտիվ քաղաքականություն։ Էմիրատն ունի գազի վաճառքից գոյացող զգալի միջոցներ, իսկ Քաթարի «Ալ Ջազիրա» հեռուստաընկերությունը՝ նշանակալի ազդեցություն ողջ արաբական աշխարհում: