Կանադահայ համայնքը ուղերձ է հղել հայաստանյան հասարակությանը

Կանադահայ համայնքը արձագանքելով «Հարսնաքարում» տեղի ունեցած դեպքերին ուղերձ է հղել հայաստանյան հասարակությանը և ստորագրահավաք է կազմակերպել այդ կապակցությամբ։

Սիրելի հայրենակիցներ,

Հայաստանի ապագայով մտահոգ ողջ կանադահայությունը ցնցված է ՀՀ Ազգային ժողովի պատգամավոր հանդիսացող Ռուբեն Հայրապետյանին պատկանող «Հարսնաքար» ռեստորանում աշխատակիցների կողմից դաժան ծեծի ենթարկված Վահե Ավետյանի մահվան կապակցությամբ: Հայտնում ենք մեր խորին ցավակցությունը Վահեի հարազատներին և կիսում նրանց վիշտը:

Երկու երեխաների հայր, երիտասարդ բժիշկ և հայկական բանակի սպա Վահե Ավետյանի մահը հետևանք է երկրում տիրող լկտի ամենաթողության: Միանում ենք երկիրը կործանող քրեաօլիգարխիկ համակարգի հերթական սանձարձակ դրսևորման դեմ մեր հայրենիքում այս օրերին իրենց ցասումն արտահայտող մեր հայրենակիցներին և հայտնում նրանց մեր զորակցությունը:

Ստորագրահավաքին մասնակցելու համար կարող եք այցելել հետևյալ հասցեով՝ http://www.ipetitions.com/petition/vahe/