Գերմանիայի դեսպանը ընդունել է իր երկրի մեղքը Հայոց ցեղասպանության հարցում

Նոյեմբերի 23-ին Գերմանիայի դեսպան Հանս Յոհան Շմիդտը հանդիպել էր հայ աշակերտներին։ Այդ հանդիպման ընթացքում, ի թիվս այլ թեմաների, նա անդրադարձավ նաև Հայոց ցեղասպանության հարցին՝ ասելով, որ Գերմանիայում այդ հարցը քննարկվում է այդ ժամանակ Օսմանյան Կայսրությունում գերմանացի սպաների առկայության համատեքստում։

«1915-ին տեղի ունեցածը հայտնի է եղել շատ գերմանացի սպաների և դիվանագետների, ովքեր այդ ժամանակ աշխատել են Օսմանյան Կայսրությունում։ Մենք պետք է քննադատաբար մոտենանք այս հարցերին, քանի որ մեղսակից ենք եղել՝ չիրազեկելով կատարվածի մասին և չխոչընդոտելավ այն»։

Շմիդտը նշեց, որ նույնիսկ այդ ժամանակվա գերմանիայի վարչապետը, իմանալով հայերի կոտորածների մասին, հայտարարել է, որ Թուրքիան մնում է Գերմանիայի դաշնակիցը։ Սակայն նա չմոռացավ հիշատակել նաև հայտնի հասարակական գործիչ Յոհաննես Լեփսիուսի մասին, ով այդ ժամանակ բարձրաձայնում էր Թուրքիայում կատարվածը։

Դեսպանն ասաց նաև, որ ժամանակակից Գերմանիայում վատ են իրազեկված Հայոց ցեղասպամության մասին։ «Միջին կրթությամբ գերմանացին անգամ իր երկրի պատմությունը լավ չգիտի», - ասաց նա՝ հավելելով, որ Գերմանիայի Բրանտենբուրգի երկրամասը Հայոց ցեղասպանությունը ներառել է իր դպրոցների պատմության դասագրքերում։