Բավարիայի իշխանությունները նախազգուշացնում են ալպյան սառցադաշտերի հալման մասին

Բավարիայի Շրջակա միջավայրի պաշտպանության նախարարությունը զգուշացնում է բավարական Ալպերում սառցադաշտերի հալոցքի մասին, հայտնում է The Local-ը։ Ինչպես հայտնել է վարչության ղեկավար Մարսել Հուբերը, 20-30 տարի հետո Ալպերում կմնա միայն մեկ սառցադաշտ, երբ այժմ դրանք հինգն են։ Արդեն հիմա երեք սառցադաշտերը գրավում են 7.5 հեկտարի պակաս մակերես։ Միակը, որը գալիք տասնամյակում կդիմանա համամոլորակային ջերմացմանը, կլինի Հյոլլենթալֆերները (Hoellentalferner)։

Այն գտնվում է Գերմանիայի ամենաբարձր Ցուգշփիցե (Zugspitze) լեռան հյուսիսահայաց լանջին և զբաղեցնում է 30 հեկտար տարածք։ Արևի ճառագայթներից այն պաշտպանում են բարձր ժայռերը, ուստի գիտնականները գտնում են, որ այն կլինի վերջինը բավարական անհետացող սառցադաշտերի շարքում։

1820 թվականից ի վեր բավարական սառցադաշտերի մակերեսը 4 քառակուսի կիլոմետրից կրճատվել է մինչև 0.7-ի, գրում է Augsburger Allgemeine Zeitung-ը։

Ավելին, Շրջակա միջավայրի պաշտպանության նախարարությունը հաղորդել է, որ հետազոտությունների համաձայն, Ալպյան լեռներում միջինում ջերմաստիճանն աճում է երկու անգամ ավելի արագ, քան աշխարհում։ Մոտավոր հաշվարկներով, 2100 թվականին միջին ալպյան ջերմաստիճանը 3-6 աստիճանով ավելին կլինի, քան այժմ է։