Երեկո` նվիրված Անահիտ Ցիցիկյանի 85 ամյակին

Նոյեմբերի 26-ին «Մոսկվայի տուն» մշակութագործարարական կենտրոնում տեղի կունենա ջութակահար, Հայաստանի ԽՍՀ վաստակավոր արտիստուհի, պրոֆեսոր Անահիտ Ցիցիկյանի 85 ամյակին նվիրված հոբելյանական երեկո: 

Հանդիսության ընթացքում կներկայացվի Ա. Ցիցիկյանի հետաքրքիր ու հարուստ ստեղծագործական ուղին, կհնչեն ջութակահարուհու կատարումներից, կցուցադրվեն տեսանյութեր, սլայդ-շոու: Միջոցառմանը կներկայացվի նաև «Անահիտ» մշակութային հիմնադրամի գործունեության տասնամյա ուղին, տեղի կունենան «Հայկական աղեղնային արվեստի պատմություն» (նոր տարբերակ) և «Անահիտ Ցիցիկյան. կենսամատենագիտական ժողովածու» գրքերի, վաստակավոր արտիստուհու վիրտուոզ կատարումներով CD-ների շնորհանդեսները, կամփոփվեն «Ինչ գիտեմ լարային գործիքների հայ կատարողների մասին» թեմայով մանկական շարադրությունների հանրապետական մրցույթի արդյունքները: Լավագույն աշխատանքների հեղինակներին կշնորհվեն դիպլոմներ ու մրցանակներ:
Երեկոն կեզրափակվի «Մանուկ վիրտուոզներ» փոքրիկ համերգային ծրագրով:
«Անահիտ» մշակութային հիմնադրամի նախաձեռնությամբ անցկացվող հոբելյանական երեկոյի մուտքն ազատ է դասական երաժշտության բոլոր սիրահարների համար:
Երեկոյին կմասնակցեն կոմպոզիտոր, ԽՍՀՄ ժողովրդական արտիստ Էդվարդ Միրզոյանը, կոմպոզիտոր, արվեստի վաստակավոր գործիչ Մարտին Վարդազարյանը, երգչուհի, Հայաստանի վաստակավոր արտիստուհի Ալիս Հեքիմբաշյանը, դաշնակահարուհի, միջազգային մրցույթների դափնեկիր, Արամ Խաչատրյանի տուն-թանգարանի տնօրեն Արմինե Գրիգորյանը, գրող, դրամատուրգ Կարինե Խոդիկյանը, Մշակույթի աջակցության կենտրոնի նախագահ Նելլի Սարգսյանը, ջութակահար, ՀՀ ժողովրդական արտիստ Էդվարդ Թադևոսյանը: