Սիրիական խնդրի խաղաղ կարգավորումը Ռուսաստանի և Իրանի ձեռքերում է. Le Monde

Ռուսաստանն ու Իրանը շատ կարևոր երկրներ են, որոնք առանցքային նշանակություն ունեն Սիրիայի խնդրի կարգավորման համար։ Այս մասին ասել է Սիրիայի հարցով ՄԱԿ–ի և ԱՊԼ–ի հատուկ բանագնաց Քոֆի Անանը։

«Ռուսաստանը լուրջ ազդեցություն ունի Սիրիայի իշխանության վրա, թեև վստահ չեմ, որ իրադարձությունների զարգացումը մի միայն այդ կողմն է որոշում։ Իրանը նույնպես լուրջ դերակատար է Սիրիայի խնդրում։ Այդ երկիրը պետք է դառնա խնդրի կարգավորման մասնակից։ Այդ երկիրը նույնպես լուրջ ազդեցություն ունի Սիրիայում, և մենք չպետք է դա անտեսենք»,–ասել է Անանը, Le Monde պարբերականին տված հարցազրույցում։

Ըստ պարբերականի, հարցազրույցի ընթացքում, Անանը «նյարդայնացած» պատասխան է տվել առ այն, որ խնդրի խաղաղ կարգավորման առանցքային դերակատարներ՝ Ռուսաստանը և Իրանը համարվում են Բաշար Ասադի ռեժիմին զենքի հիմնական մատակարարները։ Վերջինս նշել է, որ շատ քիչ է խոսվում մյուս երկրների մասին, որոնք նույնպես զենք և լուրջ ֆինանսական օժանդակություն են ցույց տալիս Սիրիայի իշխանությանը։

Անանը ընդունել է նաև, որ Սիրիայի ներքաղաքական ճգնաժամի խաղաղ կարգավորման իր մշակած ծրագիրը հաջողություն չի ունեցել։

«Հսկայական ջանքեր են գործադրվել խնդիրը քաղաքական ճանապարհով լուծելու համար։ Մենք այդ գործում որևէ հաջողություն չենք արձանագրել, և ես չեմ կարող երաշխավորել, որ դա մեզ կհաջողվի», -եզրափակել է նա։