«Մեր իրականության որ կողմը շրջում ես՝ քաղցկեղ է»

«10 տոկոս տնտեսական անկման ցուցանիշն է, 7 տոկոսով ներքին առևտրաշրջանառությունն է պակասել, 21 տոկոսով արտահանումն է անկում ապրել։ Վերջերս լրահոսում գրված էր, որ մենք 10 քայլով հետ ենք նահանջել։ Անցած տարիների համեմատությամբ՝ մենք բացառիկ արտագաղթ ունենք. կարծում եմ, որ լավագույն պատասխանն արտագաղթի ալիքն է։ Ես այլևս չեմ խոսում բազմաթիվ խոսակցությունների ալիք բարձրացրած բանակի մասին։ Այո, բանակը պաշտելի է, բայց մեր իրականության որ երեսը դարձնում ես՝ քաղցկեղ է։ Խոսել սոցիալական երկրի մասին այն դեպքում, երբ քաղծառայողն ստանում է 40.000 դրամ աշխատավարձ…», – նոյեմբերի 24-ին լրագրողներ հետ հանդիպմանն Արտակ Զաքարյան (ՀՀԿ) – Լիլիթ Գալստյան (ՀՅԴ) ասուլիսի ժամանակ ասաց վերջինս։

Նրան Արտակ Զաքարյանն այսպես պատասխանեց. «Տիկին Գալստյան, դուք հիանալի գիտեք, թե ինչի հետ է կապված տնտեսական անկման աճը։ Աշխարհի բոլոր երկրներին է դա վերաբերում, և ով ինչպես է կարողանում դուրս գալ այդ ճգնաժամից՝ դա այդ երկրի ներքին և արտաքին ռեսուրսների խնդիրն է։ Մենք, գտնվելով կիսաշրջափակման մեջ, այնուամենայնիվ, կարող ենք դուրս գալ ճգնաժամից, ճիշտ է՝ դանդաղ։ Գոնե սոցիալական ծրագրերն երբեք Հայաստանում չեն տուժել»։

«Նախագահը նախընտրական փուլում միջինում 120.000 դրամ աշխատավարձ էր խոստանում։ Դուք ճիշտ նկատեցիք, պարոն Զաքարյան, որ երկիրը տնտեսական ճգնաժամից հանում են ներքին ռեսուրսներով ու կադրային քաղաքականությամբ։ Դրա լավագույն տարբերակն արդյունավետ կառավարումն է։ Երկիրը ղեկավարել չեն կարող մարդիկ, ովքեր բյուջեի քննարկման ժամանակ շարիկ են գլորում», – ասաց ՀՅԴ անդամը։