Ոստիկաններն անցան ցուցարարների վրայով (լուանկարներ)

Lurer.com-ը ավելի վաղ հայտնել էր, որ բժիշկ Վահե Ավետյանի յոթնօրեքի կապակցությամբ ԱԺ պատգամավոր Ռուբեն Հայրապետյանի ընտանիքին պատկանող «Հարսնաքար» ռեստորանային համալիրի դիմաց տեղի ունեցավ մոմավառություն։ Նախքան մոմավառության բոլոր մասնակիցների ժամանելը, Հելսինկյան ասոցիացիայի ներկայացուցիչ Արման Վեզիրյանը ներս էր մտել ռեստորանի բակ՝ փորձելով նկարել այնտեղ գտնվող Ռուբեն Հայրապետյանին, սակայն վերջինս հարվածել էր նրան՝ տապալելով գետնին։

Մասնակիցները փորձել են մոմերով մտնել ռեստորանի բակ, սակայն ոստիկանները թույլ չեն տվել՝ խոչընդոտելով նաև լրագրողներին։

Մոմավառության կազմակերպիչները հանդես են եկել հայտարարությամբ, որով ոստիկաններից պահանջել են տարածք տրամադրել մոմավառության ակցիան իրականացնելու և ելույթներ ունենալու համար։ Մի քանի անգամ հայտարարելուց հետո ոստիկանները անհաղորդ են մնացել, որից հետո ցուցարարները, փակելով Աճառյան փողոցը, նստել են փողոցի մեջտեղում։

Ոստիկանական շարքերը համալրվել են կարմիր բերետավորներով, մահակներով ու վահաններով զինված ոստիկաններով։ Նրանք հրելով և խփելով փորձ են արել մասնակիցներին դուրս հանել փողոցից, սակայն մոմավառության ակցիայի մասնակիցները պառկել են փողոցի մեջտեղում: Ոստիկանները, անցնելով քաղաքացիների վրայով, քաշքշելով մայթից դուրս են բերել ցուցարարներին։

Ավելի ուշ ցուցարարները շարժվել են Ռուբեն Հայրապետյանի տան ուղղությամբ:

Ռուբեն Հայրապետյանի տան մոտ ելույթ է ունեցել Լարիս Ալավերդյանը: Դիմելով ցուցարերարներին՝ Ալավերդյանը հայտարարել է, որ ռազմական բժիշկ Վահե Ավետյանի մահը առիթ հանդիսացավ քաղաքացիական նոր շարժման, որը 80-ականների շարժումից հետո 2-րդ վերածնունդն է արթնացնելու:

Լարիսա Ալավերդյանի խոսքից հետո երթի մասնակիցները «5 րոպե» լռությամբ հարգել են Վահե Ավետյանի հիշատակը։

{gallery}mom{/gallery}