Հեղափոխության օրերին «ֆեյք» բառը դարձավ ամենահաճախ գործածելին. Սաթիկ Սեյրանյան
Մեդիա
Աշխարհում, որքան էլ տեխնոլոգիաները, արտահայտչամիջոցները փոփոխվեն, միևնույնն է՝ լրագրողական արժեքները նույնն են մնում:
«Մեդիայի դերը փոփոխվող աշխարհում» միջազգային լրատվական համաժողովի ընթացքում ՀՀ Ժուռնալիստների միության նախագահ Սաթիկ Սեյրանյանը վստահեցրեց, որ լրագրողի առաքելությունն ուղղված է աշխարհը, շրջապատող միջավայրը ավելի լավը դարձնելուն:
«Մենք ապրում ենք թվային մտածողության, նոր տեխնոլոգիաների ժամանակաշրջանում: Լրագրողների առաքելությունը, սակայն, նույնն է բոլոր ժամանակներում»,-ասաց նա՝ կարևորելով մեդիայի կողմից հավաստի աղբյուրներով տեղեկատվության հաղորդումը:
ՀՀ ժուռնալիստների միության նախագահը նշեց, որ Հայաստանում Թավշյա հեղափոխությունից հետո տեղական լրատվամիջոցները, այնուամենայնիվ, մնացին ժողովրդի ձայնը՝ գրեթե ամեն վայրկյան տեղեկացնելով, թե ինչ է կատարվում մայրաքաղաքի փողոցներում, ներկայացնելով մարդկանց տրամադրությունները փոփոխությունների նկատմամբ, հեռացող իշխանության տեսակետները, միջազգային փորձագետների և քաղաքական, տնտեսական գործիչների արձագանքներն ու հասարակության սպասելիքները նոր իշխանությունից: «Հեղափոխության օրերին «ֆեյք» բառը դարձավ ամենահաճախ գործածելին: «Ֆեյք» լուրերը ոչ միայն մոլորեցնում են մարդկանց, այլև լուրջ վնասներ են հասցնում պրոֆեսիոնալ, իրենց լսարանի նկատմամբ պատասխանատու լրատվամիջոցներին»,-ասաց նա՝ ընդգծելով, որ «ֆեյք» նորությունների ազդեցությունը մեծացել է նաև Հայաստանում:
Սեյրանյանը մտահոգություն հայտնեց, որ գարնանը Հայաստանում տեղի ունեցած հեղափոխությունից հետո շատերը ինֆորմացիան սկսեցին փոխանցել «Ֆեյսբուքի» սոցիալական ցանցում` ուղիղ եթերների միջոցով, ինչը հնարավորություն չի տալիս լրագրողին հարցեր ուղղել բարձրացված թեմաների շուրջ:
Նա նշեց, որ ղարաբաղա-ադրբեջանական սահմանին տեղի ունեցած պատերազմը ցույց տվեց, թե սոցիալական ցանցերը և մեդիաները միասին ինչպես կարող են աշխատել, և ինչ վտանգներ կարող են պարունակել նույն ցանցերը «ֆեյք» տեսանյութերի, լուրերի, լուսանկարների առումով: «Հակամարտությունը շարունակվում է և նման հակառակորդի պարագայում, ինչպիսին Ադրբեջանն է, ինչ կկատարվի ֆեյքային նման նորությունների, պրոֆեսիոնալ և ավանդական լրատվական դաշտի դեֆորմացիայի պայմաններում: Սա մեզ համար, հակամարտություն ունեցող որևէ երկրի համար թիվ մեկ հարցն է»,-հավելեց Սեյրանյանը՝ հույս հայտնելով, որ մեդիաֆորումի ընթացքում անդրադարձ կկատարվի բարձրաձայնված խնդիրներին:
ՈՒՂԻՂ ԵԹԵՐ
Ամենադիտված 
Ծնողները մահացել են, 3 երեխաները հիվանդանոցում են. նոր մանրամասներ ողբերգական վթարից
