Գորբաչովը դեմ է Պուտինի «երրորդ ժամկետին»

«Վլադիմիր Պուտինի` երրորդ անգամ նախագահ դառնալու ցանկությունը չի՛ համապատասխանում ժողովրդավարության սկզբունքներին, չնայած Պուտինի այդ քայլը չի էլ հակասում ՌԴ Սահամանդրությանը», –  ասել է ԽՍՀՄ նախկին նախագահ Միխայիլ Գորբաչովը։

ԽՍՀՄ նախկին առաջնորդը "Associated Press" լրատվական գործակալությանը տված հարցազրույցում հայտարարել է, որ պետության ղեկը պետք է այնպիսի առաջնորդ ստանձնի, ով կկարողանա ներկայացնել իր ժողովրդի մեծամասնության շահերը և չի ոտնահարի նրանց իրավունքները, այլ ոչ թե նա, ով միայն ծառայում է «կորպորատիվ» շահ ներկայացնողներին։ Միխայիլ Գորբաչովը նաև իր կասկածն է հայտնել` դեկտեմբերի 4-ին ՌԴ Պետդումայի ընտրությունների արդար անցկացման վերաբերյալ։

Երեքշաբթի ամերիկյան "The Wall Street Journal" պարբերականին տված հարցազրույցում Գորբաչովը Ռուսաստանի կառավարման համակարգն անվանել է «ավտորիտար» ռեժիմ և հայտնել, որ ռուսական իշխանությունները պետք է լրջորեն պայքարեն արդար ընտրությունների անցկացման, անկախ դատական համակարգի կայացման և ժողովրդավարության հաստատման համար։  

ԽՍՀՄ առաջին և միակ նախագահ Միխայիլ Գորբաչովը ռուսական էլիտայի ավտորիտար կարգերը չընդունող ռուսաստանցիներին կոչ է արել ամեն գնով պայքարել և առաջիկա Պետդումայի ընտրություններում դուրս մղել Պուտինի գլխավորած «Единая Россия» կուսակցությանը։