Արքայադուստր Սառա բինտ Թալալ բին Աբդուլազիզը ապաստան է խնդրել

Սաուդյան Արաբիայի արքայադուստր Սառա բինտ Թալալ բին Աբդուլազիզը (Sara bint Talal bin Abdulaziz) խնդրել է Մեծ Բրիտանիայի իշխանություններին, որպեսզի իրեն ապաստան հատկացնեն։ Այս մասին հուլիսի 7-ին գրել է The Daily Telegraph-ը։

38-ամյա արքայադստեր խոսքերով՝ իր հայրենիքում նրա կյանքին վտանգ է սպառնում։ Սառա բինտ Թալալ բին Աբդուլազիզը չի թաքցնում, որ ապաստան է խնդրում, քանի որ իրենց թագավորական ընտանիքում լարվածություն կա։ Արքայադուստրը հայտարարել է, որ ինքը զրպարտության է ենթարկվել Սաուդյան իշխանությունների կողմից, իսկ իր հաշիվները սառեցվել են։ Սառա բինտ Թալալ բին Աբդուլազիզը 2007թ.ից ապրում է Մեծ Բրիտանիայում. այն ժամանակվանից, երբ վիճել է հոր՝ Թալալ բին Ադել-Ազիզի հետ։ Վիճելու պատճառը չի նշվում։ Ենթադրվում է ՝ արքայադուստր Սառան արժանացել է հոր դժգոհությանը այն պատճառով, որ աջակցել է վերջինիս հակառակորդին։

Բացի այդ, արքայադուստրը դատական ընթացքի մեջ է իր եղբոր հետ՝ հանգուցյալ մոր թողած կտակի համար, որը կազմում է 325 միլիոն ֆունտ ստերլիգ։ Սառա բինտ Թալալ բին Աբդուլազիզին սպառնում է արտաքսում Մեծ Բրիտանիայից , երբ լրանա նրա վիզայի ժամկետը։ Երկու տարի առաջ լրացել է նրա սաուդյան անձնագրի ժամկետը, իսկ Սաուդյան Արաբիայի դեսպանատունը մերժել է նրան տալ նորը։ Ներկայումս Սաուդյան Արաբիայի արքայադուստրը իր 4 երեխաների հետ ապաստանում է Լոնդոնի 5 աստղանի հյուրանոցներից մեկում. նրա եկամտի աղբյուրի մասին ոչինչ հայտնի չէ։