Հայկ Մելիքյանը նպատակ ունի մնալ Հայաստանում ու զարգացնել դաշնամուրային արվեստը

Նոյեմբերի 25–ին Առնո Բաբաջանյան համերգասրանում տեղի կունենա Հայկ Մելիքյանի ժամանակակից երաժշտության համերգը։

Հայկ Մելիքյանը Հայաստանի առաջատար դաշնակահարներից է։ Նա սկզբնական կրթությունն ստացել է Իրինա Գրիշինսկայայի մոտ, ապա՝ Երևանի կոնսերվատորիայում։

Երիտասարդ դաշնակահարը ելույթներ է ունեցել ոչ միայն Հայաստանում, այլև արտասահմանյան ամենաառաջավոր երկրներում՝ Ֆրանսիայում, Գերմանիայում, Բելգիայում, Նիդերլանդներում, Շվեդիայում, Շվեյցարիայում, Կիպրոսում, Ճապոնիայում, Մեքսիկայում և այլուր։

Մելիքյանը հայ և օտարազգի բազմաթիվ կոմպոզիտորների առաջին կատարողն է։ Բազմաթիվ մրցանակների է արժանացել արտերկրում՝ ամեն տեղ բարձր պահելով Հայաստանի անունը։ Նա ակտիվորեն զբաղվում է կոմպոզիցիաներով։ Հեղինակ է բազմաթիվ կամերային–գործիքային, վոկալ, նաև սիմֆոնիկ և երգչախմբային գործերի։

ԼՈՒՐԵՐ.com–ի հետ զրույցում Մելիքյանն ասաց, որ ամեն անգամ մեկնել է Հայաստանից համերգների, բայց երբևէ չի ցանկացել մնալ այլ երկրներում։ Կարծում է, որ երբևէ չի հեռանա հայրենիքից. «Ընդհակառակը՝ ցանկություն ունեմ մնալ Հայաստանում և զարգացնել դաշնամուրային արվեստը։ Այս պահին աշխատում եմ միայն կատարողական հմտությունների վրա»:

Հարցին, թե ի՞նչ այլ ծրագրեր ունի Մելիքյանը և չի՞ ցանկանում արդյոք հետագայում փորձը փոխանցել եկող սերունդներին, դաշնակահարը պատասխանեց. «Դպրո՞ց բացել. լավ միտք է…»։