Առնվազն պետք է հոգեկան խանգարում ունենալ, որպեսզի մարդ խփել, իսկ հետո ներողություն հայցել

«Ոստիկանության գործողությունները գնահատում եմ ոչ ադեկվատ և գտնում, որ խախտվել էր համաչափության սկզբունքը։ Խաղաղ ակցիա հանդիսացող մոմավառության ժամանակ ականատես եղանք, թե ինչպես ոստիկանությունը պաշտպանեց օլիգարխներին, այլ ոչ թե ժողովրդին»,- Lurer.com-ի հետ զրույցում ասաց «Պահանջում ենք պատժել «Հարսնաքարում» տեղի ունեցածի բոլոր մեղավորներին» նախաձեռնության համակարգողներից Մհեր Արշակյանը։

Այն հարցին, թե ինչպես կմեկնաբաներ Ռուբեն Հայրապետյանի՝ երեկ Արման Վեզիրյանին հարվածելուց հետո այսօր ներողություն խնդրելու իրողությունը, շարժման ակտիվիստը պատասխանեց.

«Դեպքը ապացուցում է, որ մանդատը վայր դնելու նախորդ սրտաճմլիկ ու մեղայական հայտարարությունը պարզապես ձևական բնույթ ուներ կամ էլ մարդ առնվազն պետք է հոգեկան խանգարում ունենա, որպեսզի մարդ խփի, իսկ հետո ներողություն խնդրի։ Եթե ինքը չի կարող տիրապետել իրեն, թող համապատասխան մարմինները համապատասխան միջոցառումներ ձեռնարկեն»։

Մհեր Արշակյանի փոխանցմամբ՝ իրենք շարունակելու են պայքարել արդարության վերականգնման և իրական մեղավորի պատժման համար, իսկ առաջիկայում նախատեսված են բազմաթիվ միջոցառումներ։